ORANJESTAD, Aruba – Recientemente Hospital a introduci orarionan di bishita nobo, di cual antes manera conoci por a bishita mainta y anochi. Mundialmente esaki conoce un cambio pa añanan y despues di a haci algun sondeo na Aruba, papia cu diferente experto, Dr. Horacio E. Oduber Hospital a dicidi di introduci e cambio den orario di bishita. Charlaine Alexander-Huntington, Gerente di Comunicacion di Hospital, a duna di conoce cu e orarionan lo bira di 11:30am pa 1:00pm y di 3:00 di atardi te cu 8:00pm pa loke ta e departamentonan di cuido. Tene bon cuenta cu esakinan no ta conta pa e departamentonan ICU/CCU, Maternidad, Mucha, PAAZ y Stroke Unit.
E cambio aki mundialmente a demostra cu ora un famia ta forma parti di e cuido di un pashent, e pashent ta recupera mas lihe. Nan ta provee sosten emocional cu siguramente ta yuda cu e mehoracion. Tambe pa hopi aña caba hospital conoce e regla cu un pashent por ricibi un maximo di 2 bishitante na mes momento. Pero mirando e orarionan cu tabata asina cortico den oranan di mainta y anochi, bo ta haya tur hende na mesun momento ta bishita cu alfinal ta trece un cansancio p’e pashent. Aworaki cu tin mas flexibilidad den orario di bishita cu ta trece cune cu no tur hende ta bin na mesun momento. Paso aworaki e orario di bishita a bira mainta di 11.30AM pa 1PM y di di 3PM te cu 8PM. Ta conseha si pa check cu e pashent ki ora ta miho pe pa bishit’e.
Charlaine Huntington a duna di conoce cu tin pashent cu durante nan estadia den Hospital tin cu haci algun cambio den nan bida cu ta sea den comemento of otro y pues ta consehabel pa famia of amistad t’ey durante nan recuperacion pa asina siña con pa bay om cu e cambionan aki despues cu sali for di Hospital. Asina aki ora cu nan bay cas, nan a custumbra cu e cambionan aki caba. “Esaki ta algun di e motibonan pakico ta importante pa haci e orario di bishita mas extenso y flexibel”, asina el a duna di conoce. Cu e cambio aki tin mas flexibilidad pa bishita hende na hospital.
E cambio aki ta pa departamentonan di cuido so y no pa departamentonan specialisa manera ICU/CCU, departamento di mucha, departamento di maternidad, PAAZ y Stroke Unit cu ta forma parti di B3 cu ta den e toren nobo. El a duna di conoce cu esaki ta pa motibo cu e departamentonan cu tin por ehempel hendenan den cuido intensivo ta rekeri mas trankilidad y pues no por ricibi bishita constantemente. Esaki ta nifica cu nan orario ta keda manera ta conoci di 12:00pm pa 1:00pm y di 7:00pm pa 8:00pm, tambe pa loke ta e Stroke Unit ta unda cu hendenan a sufri di stroke di cual nan tambe mester di mas trankilidad.
E departamento di mucha e tata y mama por keda durante dia. Pa loke ta e departamento di kraam/verlos manera ya ta conoci 2 persona por drenta cerca e pashent durante e parto y despues durante dia e mayornan por ta presente cu e baby. “E orario di bishita ta keda diferente pa asina duna e mama y yiu mas trankilidad”, asina Charlaine Huntington a duna di conoce.
Riba dianan di fiesta e orario di bishita na hospital lo ta di 11:30am te cu 8:00pm cu excepcion di e departamentonan specialisa. Si un famia of amistad tin un persona interna, por pasa libremente entre 11:30am y 8:00pm durante dianan di fiesta manera Pasco, Aña nobo y otro aña manera riba dia di Pasco grandi e orarionan aki ta valido.