Home » Despues di a gana “Lifetime Achievement Award” Marriott Resort Aruba Stellaris Casino a celebra logro di Hubert Kip

Despues di a gana “Lifetime Achievement Award” Marriott Resort Aruba Stellaris Casino a celebra logro di Hubert Kip

by Admin
0 comment 68 views

ORANJESTAD, Aruba – Marriott Resort Aruba Stellaris Casino a celebra e logro di Hubert Kip, kende a gana e “Lifetime Achievement Award” di e 2017 AHATA Excellence Award. E celebracion organisa tabata pa gradici Hubert Kip pa tur loke el a haci pa Stellaris Casino desde cu el a cuminsa cu nan, pero tambe p’e industria di casino. Hubert Kip tin un trayecto largo den casino unda cu e tabata parti di e doñonan di 2 casino, esta AruCino y BoneCino. Hubert tabata tin differente etapa den su carera den e mundo di casino pero na Marriott e la sinti su mes na cas.

Hubert Kip Pit Boss di Stellaris Casino a cuminsa traha den turismo dia 16 di October 1959 y desde e tempo ey e ta trahando den e industria aki. Door di su experiencia el a traha na diferente caminda manera Corsou, Surinam, Venezuela. Desde tempo cu el a drenta pa traha den un casino, eynan el a keda, asina el a conta. E ta trahando den Stellaris Casino pa 22 aña, di cual el a inicia na aña 1995. Segun Hubert Kip, e ta e persona di mas bieu den Antias trahando den casino pasobra e tin 58 aña den e industria.

El a cuminsa traha den e prome casino di Aruba cu tabata Aruba Caribbean Hotel na momento cu e tabatin 18 aña. “Desde e tempo ey mi a keda den dje te e dia di awe”, Hubert Kip a expresa. E ta sumamente contento di a logra e premio aki, pasobra nunca el a spera di gana esaki. “Semper ta lubida riba nos cu ta traha den casino, pero e biaha aki si nan a corda riba un di nan”, asina el a expresa.

Empleadonan di Stellaris Casino a bini hunto pa celebra e logro di Hubert Kip. Ben Figaroa Gerente General di Stellaris Casino a expresa cu e ta sumamente orguyoso di por traha cu un pionero manera Hubert Kip, un professional completo den tur sentido. Esaki ta un mile stone y esaki ta un dedicacion hopi grandi di parti Hubert Kip. E ta un di e pioneronan di Aruba cu a cuminsa den e industria di casino. “Mi ta kere e ta un ehempel pa hopi generacion, Hubert ta un experto den e wega di Roulette y Craps. E conosemento di Hubert pa loke ta e industria di casino ta algo cu nos tin di balora y educa esnan nobo den e industria”, asina Adolf Everon Director di Player Development y Casino Services a elabora.

Gerente General Ben Figaroa a duna Hubert Kip pabien pa logra e “Lifetime Achievement Award” di AHATA. Esey ta un tremendo logro pa cu e añanan di experiencia y dedicacion cu el a trece den e industria, pero tambe e ehempel cu Hubert Kip ta p’e empleadonan. Ben Figaroa a indica cu Hubert Kip ta un di e pioneronan cu a sali for di Aruba y lanta casinonan den Caribe, Latino America, Centro America y hopi caminda mas unda el a exporta e conocemento di casino pa yuda otro pais y compania pa lanta casino. Awe nan ta celebra e logro di nos hendenan local cu a sobresali den su carera y cu ta un experto den su ramo como tambe un mentor pa nos hobennan den e industria di casino.

Adolf Everon Director di Player Development y Casino Services ta recorda cu na momento a celebra 50 aña di Hubert Kip den e industria esaki tabata algo grandi. Nan ta mira Hubert Kip como un role model, pasobra na momento cu nan yega ya caba Hubert Kip t’ey desde trempan preparando pa cuminsa un shift 1 ora despues. “Ohala awendia hopi di nos trahadonan por sigui bo ehempel”, asina Adolf Everon a expresa. Hubert Kip y Adolf Everon a traha den pasado cu otro den La Cabana y awendia nan tin 23 aña como colega.

Aruba Marriott Resort & Stellaris Casino a habri na aña 1995 y ta e casino mas grandi riba nos isla. E ta conta cu mas di 160 empleado, cu ta maneha 24 wega di mesa y casi 500 slot machines. E weganan mas popular riba mesa ta Craps, Black Jack, Three Card Poker y Roulette, mientras cu e mashinnan mas uza ta esunnan di e sistema 3D y e “mystery Progressive Jackpots”.

Stellaris Casino ta conta cu entretenimento bibo, diadomingo pa diaranson di 9:00pm pa 1:00am cu un live DJ, diahuebs pa diasabra di 9:00pm pa 1:00am cu diferente banda live.

E casino ta habri 24 ora pa dia pa weganan di mashin mientras cu weganan di mesa ta cuminsa pa 4:00pm te cu 4:00am.

Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio