Diadomingo cu a pasa dia 10 december 2017 nos fundacion Ban Educa y Prepara, derecho humano, trato igual y zero discriminacion a organisa un caminata pasivo pa conmemora e fecha di Declaracion Universal di derechonan humano cu a wordu reconosi pa Nacionnan Uni 10 december 1948. E caminata aki a bai bon y nos ta masha contento cu un grupo chikito a sali pa cana no solamente pa demostra derecho propio pero tambe pa demostra cu nos tur tin mes derecho. “Nos tur ta Un” ta e lema cu a carga e caminata aki. Human Rights Power Walk lo continua den anja 2018 y lo desea di mira full Aruba cana huntu pa un solo meta cu ta derecho humano y trato igual. Danki na tur cu a forma parti di e caminata aki. Nos kier a duna un danki na nos sponsornan Balashi, Ronchi e Cuba, Tia Rosa Snack,
El Gaucho Restaurant y The Elohim Agency cu nos por a reparti premionan.
Fundacion Ban Educa y Prepara kier a pidi pueblo pa nunca stop di kere den derecho humano. Nunca stop di para pa bo mes derecho y derecho di otro cu nan derecho ta wordu trapa y ignora. Ban sigi lucha contra tur tipo di abuso. Abuso sexual, abuso fisico y abuso verbal cu ta wordu cometi contra di nos muchanan. Ban para pa tur ser humano cu ta wordu abusa. Ban para contra violencia, discriminacion, odio, bullying y crimen. Nos tur a nase liber y igual y tin tur derecho pa wordo trata igual, pa tin oportunidad igual. No haci cu otro loke bo no kier pa otro haci cu bo. Stima bo prohimo manera cu bo ta stima bo mes. Amor ta e sentimiento di mas grandi cu nos tin cu carga den nos curason pa otro. Ban respeta otro pasobra nos tur ta diferente pero comun den un cos. Nos tur ta un Ser Humano crea pa nos nos creador.
Sin mira rasa, color, sexualidad, creencia, genero, edad, nacionalidad, bo idioma cu bo ta papia, bo condicion fisico, bo color politico nos tur tin e mesun derecho.
Derechonan di e ser humano ta ancra den capitulo 1 di nos constitucion. E fundacion ta haya importante pa e comunidad den un forma continuo tene cuenta cu su propio derechonan y e derechonan di otro. No solamente comunidad pero tambe mandatarionan ta ser spera di nan cu derechonan humano ta haya un posicion central den maneho diario.
Terminando cu un quote di Malcolm X “ The future belongs to those who prepare for it today”
E ta un quote masha poderoso. Educacion y Iluminacion ta e caminda pa un mihor futuro. Ban educa nos mes riba cosnan positivo y laga e lus di positivismo ilumina nos caminda pa haci un diferencia unda cu nos bai. Ban para contra tur cos cu ta negativo, cu ta haci danjo na e ser humano cu ta abuso, violencia, maltrato, discriminacion, bullying, odio y crimen.
Ban lucha pa Igualdad y ban para pa husticia.
Fundacion Ban Educa y Prepara
Derecho humano, trato igual y zero dicriminacion