Ministerio Publico a ricibi siman pasa un denuncia for di cual a resulta cu señor E.C. posiblemente a haci su mes culpable na verduistering di algun propiedad cu lo ta perdi di bestuurskantoor, desde entrego di gobierno anterior na gobierno actual.
Den varios medio di comunicacion e topico aki a wordo poni den un contexto mucho mas amplio, y dor di esey el a haya un dinamismo bastante particular.
Ministerio Publico di su parti ta haya importante pa enfatiza cu e denuncia contra E.C. a wordo huzga unicamente riba su meritonan penal, y tambe cu ta a base di esey so Ministerio Publico a traha riba e aangifte. Ministerio Publico a acerca e denuncia den completo neutralidad.
Mescos cu den cualkier otro caso, a cuminza un investigacion penal obhetivo.
Den e investigacion aki a scucha varios persona envolvi, y a haci huiszoeking bao guia di Huez-Comisario, unda a tuma cosnan den beslag. E sospechoso E.C. a wordo deteni.
Tur e pasonan aki cu Ministerio Publico a tuma, tabatin nan hustificacion den e informacion cu na e momento ey tabata disponible.
Aunke Ministerio Publico no a cla cu e investigacion ainda, no tabata necesario mas na e altura aki di e investigacion pa e sospechoso E.C. keda den detencion.
Pesey el a wordo poni den libertad riba 13 di December ultimo.