ORANJESTAD – E alegria y calor caracteristico di nos pueblo a keda refleha den e celebracion cu a tuma luga diahuebs merdia pa conmemora e yegada di e prome 700 mil bishitante crucero den historia di turismo crucero di nos isla.
Esaki tabata un momento historico y un record pa nos isla, cu autoridadnan turistico, local ta sumamente orguyoso di por a alcansa y comparti cu comunidad.
Presente pa e ocasion special aki cu a tuma luga riba tereno di waf crucero na Playa, tabata Minister di Turismo Danguillame Oduber, CEO di A.T.A. Ronella Tjin Asjoe-Croes, Director di Aruba Ports Authority Jossy Figaroa, y invitadonan.
E turistanan honra como e di 700 mil bishitante crucero, ta Van & Zodavina Bingham.
Nan a keda gratamente sorprendi pa tur e atencion, espectaculo y emocion rond di e ceremonia cu a inclui musica, baile y sabor tipico di nos isla. Como regalo nan a ricibi un estadia completamente paga pa asina nan bolbe Aruba. Ademas, nan a ricibi un tour di nos isla y un plakaat conmemorativo di ta e di 700 mil pasahero crucero di Aruba.
Titular di Turismo a hiba palabra felicitando tur esnan responsabel pa e logro aki y mencionando con Aruba ta yegando otro aña, na su di 60 aniversario di turismo crucero cu un industria cu ta solido y ademas tin perspectiva pa mas crecemento.
Tjin Asjoe-Croes a enfatisa durante su discurso, con complaci e ta di mira cu e esfuerzonan pa atrae bishitantenan durante temporada abao, ta dunando resultadonan sumamente positivo. A reafirma cu e trabounan aki lo continua, y como tal, ta premira aumento den e cifranan pa aña 2018 tambe. Tjin Asjoe-Croes a gradici pa e cooperacion di semper di parti di Ministerio di Turismo, Aruba Ports Authority y e division den A.T.A. encarga cu turismo crucero.
Masha pabien Aruba! E record aki den bishita di turista crucero ta prueba di nos forsa ora nos ta traha hunto como un solo pueblo; ya cu nos tur, for di e oficialnan di inmigracion, e bendedornan, e guianan di tour, taxistanan y cada ciudadano, ta forma parti di e bon impresion cu turistanan ta haya y ta agrega na nos bon reputacion como destino turistico. Tambe e record aki mester ta un estimulo pa nos sigui brinda e miho di nos mes tur dia, y sigui mantene e nomber di Aruba na halto. Ta reconoce cu desaroyo asina ta trece su retonan tambe y A.T.A. ta sigur pone hopi atencion riba desaroyo di Aruba su producto turistico y ta stimula pa tur ta consiente di importancia di por ofrece un experiencia sigur, alegre y di calidad. A.T.A. cu su ekipo lo sigui duna prioridad na esaki.