Minister di Husticia mr. Andin Bikker: Un cuerpo policial bon equipa ta bai mehora e insiguridad cu tin riba nos isla

Ministerio di husticia mr. Andin Bikker kier duna sindicado di polis SPA y tur su miembronan tur atencion pa trece siguridad atrobe pa tanto esnan cu ta traha den field y henter comunidad. Recientemente den un reunion cu sindicado SPA, e mandatrio a mustra cu tin hopi preocupacion pa loke ta trata insiguridad cu tin riba nos isla y ta algo cu Aruba a hereda for di e gobierno anterior. Segun minister Bikker, pa tanto e gabinete aki como pa su ministerio, siguridad ta un di e prioridadnan pasobra cuerpo policial ta instrumental pa mehora y restaura siguridad di nos pais. Den e proceso aki ta hopi importante pa gobierno ta na altura kico ta bibando den comunidad, pasobra gobierno kier duna oido na e sindicato y su miembronan pa loke ta nan preocupacion. Un di e preocupacionnan ta e problema di personanan cu problema mental cu ta hopi serio. Diarason ultimo tabatin un incidente unda un persona cu problema mental a bira agresivo cu un miembro di cuerpo policial te cu mester a usa arma. Segun minister Bikker den e cuadro aki a yama e reunion urgente cu sindicato SPA pa nan ta na altura cu e gabinete aki y e como minister di husticia ta duna hopi atencion pa yuda preveni e tipo di incidentenan aki. Tambe e mandatario a splica miembronan di SPA, cu na Hulanda tin un proyecto piloto andando pa evalua con por yuda cu mas equipo manera e taser. Si un polis topa cu un pashent cu problema mental por yuda calma e pashent usando un taser enbes di saca un arma. Minister mr. Andin Bikker ta sigui bisa cu for di colega minister di Salubridad por a compronde cu ta un number basta preocupante riba nos isla cu a detecta cu tin problema mental. Debi na e cifra aki hopi biaha e polis cu ta traha den field ta haya su mes ta deal cu famia cu ta pidi ayudo pasobra un miembro di famia cu problema mental ta bira agresivo riba nan. Na Juli di e aña aki tabatin un incidente fatal di un miembro di cuerpo policial y for di e tempo ey caba den contienda electoral minister Bikker a señala caba cu e kier duna atencion urgentemente na e situacion aki. Un di nan ta equipa miembronan di cuerpo policial bon, cu nan por eherce nan trabao, manera taser, chaleconan anti bala y equiponan den nan auto. Ora un polis bai na un adres ya caba nan tin aceso for di un database y e polis sa cu na e adres ey ta biba un persona cu tin problema di enfermedad mental. Cu e equipo aki e polis por ta prepara y por haya historia caba kende ta biba na e adres. For di sindicato SPA, Minister Andin Bikker a haya un lista di preocupacion pa mehora parti seguridad pa nos isla y mehora nan condicion laboral. Loke sindicato di polis tambe a trece dilanti den e reunion cu Minister Bikker ta articulo 33 di LTU, unda cuerpo policial no tin claridad riba autoridad pa controla persona ilegal riba nos isla, pasobra esey ta solamente autoridadnan di Warda nos Costa ta haciendo. Di parti sindicato nan a supraya cu nan kier haya e autoridad aki bek pasobra na 2008 polis tabata haci e control riba pesonanan ilegal y despues no mas di cual nan ta haya falta di dje. Segun Minister den un reunion cu Director di Directie wetgeving, e tema aki ta un di e puntonan cu a pone como prioridad pa evalua ta con na un manera rapido por yega na soluciona e deseo di cuerpo policial di articulo 33 di LTU. Resumiendo e encuentro cu sindicato di polis SPA, Minister mr. Andin Bikker ta haya cu e reunion a bai den bon ambiente unda e mandatario a expresa su preocupacion y trata di bin cu solucion pa incidentenan cu ta keda ripiti nan mes di persona cu problema mental cu casi diariamente miembro di cuerpo policial ta confronta cune. Minister Bikker ta haya cu un di e posibel solucion ta pa equipa cuerpo policial miho y bin cu entre otro e taser. Den e proximo encuentro cu lo tuma luga na Hulanda na januari unda e minister Bikker lo ta presente pa reuni cu coleganan Minister di Husticia y un di e puntonan di agenda ta, pa pidi cooperacion di tur proyecto pilot cu tin na Hulanda pa loke ta trata uso di taser pa asina no inventa e wiel full di nobo. Un otro preocupacion di parti sindicato SPA, cu e schiet kalender practicamente no ta existi pasobra no tin suficiente municion esta bala pa e miembro di cuerpo policial por train constantemente pa siña miho con pa trata cu arma. Di parti minister Bikker ta bai tira un bista riba dje. Den su totalidad por a detecta cu tin hopi falta di material, uniformnan cu ta bieuw, diferente aspecto di e autonan. Apenas ta dos siman cu e gabinete aki ta eherce su responsabilidad, pero e echo cu Minister Bikker ta reuniendo cu tur hefe di departamento y hasta e sindicatonan cu tambe kier contribui cu solucion pa por eherce nan trabao miho y mehora proteccion den comunidad. Minister di Husticia mr. Andin Bikker tin oido pa e problematica den comunidad y di biaha kier bin cu posibel solucion pragmatico y realisabel pasobra tur hende sa cu pais Aruba ta den un reto hopi grandi cu ta trata e aspecto financiero. Pero no obstante e poco recurso cu tin lo bai trece siguridad pa nos pueblo y e felicidad pa nos pueblo.