ORANJESTAD – Banda di su compromiso grandi pa locual ta su responsabilidad como minister encarga cu e carteranan di Finanzas y Economia, diasabra anochi Minister Sra. mr. Xiomara Ruiz-Maduro, Aruba su minister di Cultura, cu hopi placer a acepta e invitacion pa efectua apertura di e Festival di Ranchera organisa pa Cuerpo di Douane, cual departamento ta resorta bao di e ministerio di Finanzas, Economia y Cultura.
Como recuerdo director di Aduana Sr. mr. Roderick Lionel Croes a obsequia un bunita medaya na e mandatario cual na su turno a aprecia y gradici pa e bunita gesto y ocasion. Un Centro di Bario Noord bon concuri yen di animo a presencia y disfruta di un bunita festival caminda tabata tin participacion di 30 cantante.
Durante su discurso Minister Ruiz-Maduro a expresa palabranan di exito na tur participante cu a bin demostra nan talento den canta e musica di ranchera y presenta den nan trahe charo y china. Ademas e mandatario a felicita esnan encarga cu e organisacion di e festival. Un pabien grandi na tur e ganadornan cu a bay cu un premio. A resalta un biaha mas e carisma di e mandatario cu durante e anochi a pasa saluda y combersa cu e publico presente.