Pa keda den contacto cu su sostenedornan y comunidad completo
Diadomingo, 3 di december, Team Rocco a organisa un tremendo fundraising den forma di bendemento di cuminda na Savaneta. Meta di e fundraising aki tabata pa cubri gastonan di e campaña tras di lomba.
Manera ya ta conoci Rocco Tjon a hiba un campaña fuerte den corto tempo, despues cu poco menos cu 2 luna prome cu eleccion el a lansa su mes como candidato. Cu e campaña aki el a sa di logra 1213 voto cu a haci’e e di 5 vote-getter riba e lista geel. Awe Rocco ta un Parlamentario y e Lider di Fraccion di MEP.
Como un bos di pueblo den e organo mas halto di nos pais, ta hopi importante pa sa kico ta e preocupacionnan cu ta biba den nos hendenan. Y manera el a priminti durante su campaña, e no lo t’ey solamente den temporada di eleccion. P’esey meta di fundraising nan asina aki tambe ta pa keda den contacto cu su sostenedornan y comunidad completo.
Ademas, no kier depende riba sponsor y pa e motibo aki tambe Team Rocco lo bin cu diferente actividad structural pa 4 aña largo, pa cubri gastonan di e campaña cu a pasa caba y pa prepara pa e campaña y eleccion aki 4 aña.
Team Rocco kier a gradici tur hende cu a yuda den un forma of otro pa haci e actividad di bendemento di cuminda un exito. Alaves ta pidi comunidad pa keda pendiente pa e siguiente actividadnan den 2018.