Diabierna mainta tempran na Plaza Padu, Prome Minister Evelyn Wever-Croes y Presidente di Parlamento Sr. Ady Thijsen a ricibi e version traduci di e Tratado tocante derecho di persona cu for di “Stichting voor Verstandelijk Gehandicapten Aruba” relaciona cu Dia Mundial di Hendenan cu Limitacion dia 3 di December. Na e ocacion aki tabata presente tambe Ministernan di Gabinete Wever-Croes y Parlamentarionan.
Prome Minister Evelyn Wever-Croes a hiba palabra na e ocacion aki y a elogia y gradici tur esnan cu ta traha den e trabou difisil di guia nos muchanan special.
E Tratado tocante derecho di persona cu discapacidad ta hopi importante pasobra aki ta trata di haci e ser humano central cual ta hopi importante den maneho di Gobierno. Y nos lo cuminsa cu esnan mas vulnerable den nos comunidad na unda e grupo di personanan special tambe ta parti.
Ta pa Gabinete Wever-Croes un prioridad pa traha pa tur persona special tin miho oportunidadnan. Pa bay scol, pa tin un trabou, pa tin un cas. Tur mester tambe tin e cariño y amor di famia.
Inclusion pa esnan special ta un compromiso di Gobierno pa tur mucha special haya un luga den nos comunidad caminda nan por bay scol y despues cu nan haci 16 aña por bay na un scol di ofishi cu lo yuda nan drenta mercado laboral y wordo inclui den nos comunidad y goza di tur derecho mescos cu tur otro ciudadano riba nos pais.