Abuso cu placa di pueblo bao di AVP ta pa pasado!
Despues cu AVP den e eleccion ultimo a bay atras cu 10 mil voto, 4 asiento y cu e parlamentario Marlon Sneek cu su 350 voto di cabey boto a bolbe drenta Parlamento, no a bin ningun cambio den e comportacion di e parlamentario menciona. Pues e mesun politica stinki di 8 aña di sr. Sneek ta continua y ya a bira un berguensa total den henter Reino Hulandes. Fuera di yama siman pasa e gobernantenan actual como “bandidonan”, siendo cu bandido ta hende cu ta horta botter di whiskey y jeans, awor sr. Sneek ta sigui cuestiona e asunto di 7 of 9 ministro, haciendo como sifuera cu esaki ta e desgracia di mas grandi cu nos pais ta confrontando, siendo cu e mes no kier realisa den ki desaster financiero su partido a laga e pais aki atras na momento cu nan a ser cori for di gobierno.
Di con a bay di 7 pa 9 minister?
Hecho ta cu ta AVP ta e partido cu e crea henter e issue di e cantidad di minister cu un pais manera Aruba mester tin. Nos tur por corda ainda con den Gabinete Mike Eman 1 (2009-2013) nan a goberna cu 7 minister y na final di e periodo di gobernacion na 2013 nan tur incluyendo Marlon Sneek a grita cu nan a haci un bon trabao y ainda falta. Pero e ainda falta a resulta despues den ampliacion di e cantidad di ministernan for di 7 pa 9 y p’asina nan por a acomoda dos miembro mal mucha den partido cu cueste loke cueste kier a bira minister, esta Juan David Irausquin y Paul Croes. Pues e pregunta na sr. Sneek ta cu si bo gobierno a goberna asina bon y a haci un bon trabao cu 7 minister, dicon abo tambe a bay di acuerdo pa amplia e cantidad di ministernan cu dos mas? E ampliacion di e cantidad di ministernan y tur nan coordinadornan a resulta un peso extra den tur e gastonan di gobierno, ya cu e gastonan di coordinadornan so ta suma na mas di 32 miyon florin pa aña y cu un averahe di salario di mas di 9 mil florin pa luna (!) pa cada coordinador.
Nad’un pasa
Pero e ampliacion di e cantidad di ministernan for di 7 pa 9 minister a resulta den un batacaso total, ya cu ambos minister mester a bati retirada . Asina nos por a mira con Juan David Irausquin, despues cu el a haya su aanwijzing y KB, a tuma su retiro, a cobra un suma astronomico na overbruggingstoelage, a bay biba na Merca pa “studia” y reflexiona y pa despues wordo recompensa cu un funcion di Ministro Plenipotenciario na Hulanda, ganando un biaha mas un dineral for di caha di pueblo y pa bolbe cobra overbruggingstoelage? Y pa loke ta Paul Croes su destino, despues di su bagamunderianan di corupcion y ontheffingen, a wordo tira den prison, a haya e status di ministro sin cartera, pero asina mes el a keda cobra su salario trankilmente durante lunanan largo manera nad’un pasa. Hecho ta cu Marlon Sneek a coopera den tur e bagamunderianan aki cu a ser haci cu placa di pueblo! Y riba dje el a coopera cu remplaso di dos minister (Irausquin y Oduber), siendo cu si e dos ministernan no a wordo remplasa, nan lo por a sigui goberna cu 7 minister!
Menos gasto na coordinadornan
Henter e episodio tristo aki sr. Sneek ta na altura di dje y asina mes e ta keda teima riba e hecho cu Gabinete Wever Croes a aumenta e cantidad di ministernan te na 8. Pero den e mesun rosea e no ta splica cu contrario na Gabinete Mike Eman, e gobierno actual lo bay traha cu solamente 120 consehero y coordinador. Asina pues e gastonan di coordinadornan cu bao di Gabinete Mike Eman a yega na mas di 32 miyon florin pa aña, bao di Gabinete Wever-Croes esaki lo yega na mas o menos 11 miyon florin pa aña y talvez hopi menos ya cu e salarionan exorbitante manera bao di gobierno di AVP lo no wordo paga mas. Cu esaki e gastonan di coordinadornan bao di Gabinete Wever-Croes lo ta por lo menos 21 miyon florin menos pa aña compara cu Gabinete Mike Eman.
Pues e meta final di e gobierno actual ta di baha gastonan di gobierno y cu esaki gobierno ta bisa loke e lo haci y lo haci loke e ta bisa. Y aparentemente sr. Sneek tin hopi problema cu e pensamento aki, ya cu pa hopi aña el a custumbra cu e derochamento di placa di pueblo durante su gobierno di AVP.