Diadomingo marduga un team completo a traha duro
ORANJESTAD, Aruba: Diasabra a cuminsa cu e mudamento di Emergency Department, unda cu a cuminsa move algun aparato. Diadomingo desde 5:00am a sigui cu e mudamento y aki a cuminsa pone e camanan y tur material necesario pa nan por sigui atende pashentnan. Coordinador Medico di Emergency Department, Dr. Deepu Daryanani a duna di conoce cu nan tabatin hopi tempo trahando riba e plannan y a cuminsa traha riba dje desde momento di e construccion. Di e tempo ey nan a cuminsa pensa con lo drecha e departamento di emergencia nobo y na final nan a scoge p’e setup actual, unda tin 16 camber pero lo haci uzo aworaki di solamente 9 camber.
Desde 5:00 di marduga a cuminsa cu e mudamento p’e edificio nobo, unda cu a conta cu hopi boluntario di hospital. “Nos kier a bisa nan danki p’e esfuerso cu nan a hinca den pa yuda nos, pa nos por a muda hopi bon”, dr. Daryanani a duna di conoce. E idea tabata pa haci e mudamento den 2 ora, pero na final a dura 6 ora pa por a pasa tur cos. Durante e mudamento, e pashentnan no a ripara nada pero solamente esunnan cu a presenta na departamento di emergencia entre 12:00 y 1:00 di merdia a topa cu un departamento bunita y nobo.
Dennis Hiwat medico di Spoed Eisende Hulp (SEH) a duna di conoce cu pa algun luna caba nan tabata preparando p’e mudamento y a traha den e New Bed Tower. Nan mester a check e aparatonan, e materialnan cu nan lo uza mester a yega y diasabra nan a haci e ultimo chekeonan pa asina cuminsa muda.
Martin Magdelijns, gips verband meester di Gips Kamer a duna di conoce cu nan a traha un plan pa prepara p’e mudamento. E personal di Gips Kamer tabata contento cu e mudamento. Den nan plan, nan a pone e materialnan menos uza den un caha y a pasa esakinan prome y asina a keda bay te ora a keda cla. Tambe haci un inventarisacion di e materialnan cu ta uza hopi, unda cu a mira si mester haci pedido of no. Den e edificio bieu nan tabatin un sistema di traha y esaki a bay bon, di cual nan ta spera cu den e New Bed Tower esaki lo sigui cana flexibel unda cu lo gana hopi mas tempo door di duna mas atencion na e pashent. Den e edificio bieu, e camber di gips ta den e mesun piso cu esun nobo y si nan no tabata druk, nan lo yuda den departamento di emergencia. Pero si e departamento ta druk, e ora nan lo avisa y bisa cu no por yuda nan. E relacion entre departamento di emergencia y camber di gips ta flexibel y bon, asina Martin Magdelijns a duna di conoce. Pabien na Departamento di Emergencia cu nan localidad nobo cu ta situa den e New Bed Tower, cu su entrada na e parkeo di e Toren aki. Un danki tambe na tur cu a haci e mudamento aki uno exitoso.