Chauffeur bou influencia ta perde control y ta subi e isla memey caminda

Hato: Dialuna den oranan di marduga, presencia di polis y ambulance ta wordo pidi pabou di e rotonde di Hato, pa un accident cu persona herida.

Na yegada nan ta bin compronde cu e chauffeur di e Honda tabata bayendo direccion pariba y pa un motibo of otro a subi e isla memey di caminda, a ranka un palo di lus completo y a comete basta destruccion na e matanan di Aloe cu tabata tin planta riba e pida isla ey.

E impacto fuerte a laga e dama pasahero levemente herida y personal di ambulance a trat’e na e sitio mes. E chauffeur tabata bou influencia, polis a detene y a transport’e pa warda di polis.