ORANJESTAD, Aruba: Dia 31 di oktober 2017, Post Aruba N.V. ta emiti un serie nobo di stampia titula ‘Flora 2017”.
E serie ta consisti di 8 stampia balora na 50 cen, 90 cen, 130 cen, 135 cen, 200 cen, 220 cen, 305 cen y 320 cen, cu ta yega na un prijs total di Afl. 14,50 y e ta acompaña pa su ‘envelop di prome dia di emision’ cu ta costa Afl. 17,50.
E diseñonan pa e stampia aki ta un creacion di Nigel Matthew y e stampianan ta imprimi na Johan Enschedé Security Print.
E serie di stampia ta obtenibel entrante 31 di oktober 2017 na e diferente oficinanan di Post Aruba, respectivamente na Oranjestad, San Nicolas y Sta. Cruz.
Pa mas informacion tocante e stampianan di ‘Flora 2017’ por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon
528-7678, of bishita su pagina di Facebook Aruba Stamps.
E bunita serie aki no por falta den bo coleccion. Busca esun di bo awe mes, ya cu e cantidad ta limita.
50c – FRANGIPANI – Plumeria rubra
Frangipani ta crece den un clima cayente y seco cu algun yobida modera manera esun di Aruba.
E ta un palo facil pa cultiva y ta adapta su mes na mayoria di sorto di suela. E tin su temporada di
floria y bo por mir’e hopi biaha den e hardinnan na Aruba. Asina cu un taki kibra, lechi ta lek for
di dje. E flornan ta crece den forma di un buket rondo y e colornan ta varia den blanco, ros, fucsia
y cora. Nan ta contene algun componente activo medicinal. Nan ta uza e lechi pa trata picadura
di maribomba, abeha y lisimbein.
90c – BONCHI DI CABAY – Erythrina velutina
Bonchi di Cabay ta originalmente di Sur America y nan a hib’e pa Caribe. E ta crece bira un palo grandi cu takinan cortico di pino cu ta floria hunto den troshi grandi den temporada seco. E colornan di e flornan ta oranje, peach y cora. E palonan aki tin mester di suficiente awa pa nan por sobrevivi, pero ora ya e ta un palo adulto, e ta exigi menos cuido y e por sobrevivi durante temporada seco. Tin biaha nan ta uza e casca di palo como remedi.
130c – TUNA – Opuntia wentiana
Tuna ta un especie di cadushi cu ta crece den segmento y tin sumpiña grandi. E segmentonan ta na takinan autentico cu e capacidad pa produci blachi y flor nobo. E ta crece riba henter e isla, na unda cu ta. Su sumpiña por causa un hinca masha desagradabel cu por ocasiona iritacion y tambe inflamacion di cuero. Despues di un periodo largo di secura, un awasero inespera por haci cu e tuna aki ta produci e flornan di mas bunita cu bo por imagina bo den color geel.
135c – SHOSHORO – Passiflora foetida
E nomber na latin “Passiflora foetal” pa shoshoro ta nifica literalmente “flor stinki”. E mata exotico y medicinal ta crece den mondi casi riba henter e isla. Ta existi alrededor di 500 especie di e famia Passifloraceae. Su flor, cu ta floria solamente un biaha pa dia ta fascinante pa su aparencia, tamaño y complehidad y tin un nificacion simbolico pa reconocimento di e storia di crucifixion. E flornan ta bin den tur sorto di color biña y ta varia te na un color berde dof.
200c – BEYISIMA – Antigonon leptopus
Beyisima ta crece rapidamente pa medio di su takinan. Despues di un temporada di awasero, e ta crece bay riba otro mata, palo y te hasta riba hekinan pa forma un deken di flor den color ros. E flornan ta aparece na boshi den colornan ros of blanco. Beyisima ta carga e nomber popular tambe di “coral di wijndruif”.
220c – STREA DI VENEZUELA – Ixora coccinea
Strea di Venezuela ta bin for di e parti sur di India y Sri Lanka y a bira un di e matanan cu ta floria den hopi hardin y paisahe na Aruba. E flornan chikito den color scarlata cora ta crece na boshi rondo y ta floria casi henter aña. Fuera di e color comun di scarlata, bo ta hay’e tambe den colornan geel, ros, oranje y blanco.
305c – MATA DI LECHI – Calotropis procera
Mata di lechi originalmente ta bini di Noord Africa, Palestina y henter e faha tropical eybanda. El a adapta su mes na e clima di Aruba y bo por hay’e tur caminda riba e isla. E mata aki ta carga su nomber na Papiamento, danki na e fruta di e mata cu ta contene un lechi venenoso. E ta duna un fruta color berde yen di aire, principalmente cu fibra y simia. Na Aruba, e bichi di e barbulet monarca ta alimenta su mes cu e blachi di e Mata di lechi prome cu e ta somete su mes na su metamorfose.
320c – HUBADA – Acacia tortuosa
Bo ta haya hubada den un habitat tropical y den desierto. P’esey e palo di sumpiña aki ta crece facilmente na Aruba. E tin troshi di flor chikito suave den forma rondo cu ta varia di color geel pa oranje, blachinan chikito cu ta keda berde, sumpiñanan grandi y bruto na paar, cerca di e blachinan. Te hasta cabrito ta nenga e blachinan, pa miedo di e sumpiñanan. Hubada ta floria y e tin fruta durante henter aña.