ORANJESTAD — Manera ta conosi na 2013 gobierno a ‘bende’ Stichting Onroerend Goed Aruba (SOGA) e tereno di hospital pa SOGA renoba y expande e hospital. Condicion tabata cu gobierno ta paga 24 miyon florin anual na huur na SOGA. Gobierno di AVP a otorga e proyecto na un compania amigo di nan, cu a bid pa e prijs mas halto, y cu menos experiencia. Cu esaki por a premira e problemanan cu awor nos ta pasando aden.
A resulta cu algun parti esencial no tabata inclui den e proyecto: sala di operacion, intensive care units, facilidad di micro biologia, di dos main equipment room, expansion di piso 2 di e edificio di medical office, upgrade alarma contra candela, etc, cu lo costa adicional 61 miyon. Ademas di esaki tin algun gasto mas cu ta den disputa cu gobierno, entre otro e BAZV, y esaki ta hasi e gastonan extra total 80 miyon florin.
SOGA kier cubri esaki, pero kier pa gobierno aumenta e huur cu 5 miyon florin pa aña, dus e huur ta bai bira 29 miyon florin cu gobierno mester paga tur anja na SOGA pa e hospital aki.
Huridicamente e conseheronan a bisa cu si bo lesa e contrato literalmente, e minister por hisa e prijs di huur sin pidi aprobacion di Parlamento prome, y e minister a hasi esey tambe. E minister a manda informa Parlamento si, y e Parlamento anterior a acepta e procedura aki. Sinembargo e Parlamento nobo tin un otro posicion, y no ta di acuerdo cu e forma con e Parlamento anterior a atende cu e tema importante y costoso aki. Principalmente pa e falta di transparencia.
Nos mester corda cu den pasado, MEP den oposicion a vota contra e deal aki. Ademas MEP a pidi un reunion tocante e proyecto aki desde 2014. E reunion a wordo yama pero nunca a finalisa. Fraccion di AVP e tempo ey a manda e minister pa hasi un investigacion (‘feiten onderzoek’) pa bin duna cuenta, pero nunca mas e reunion ey a continua. Na fin di 2015 e minister a bai Parlamento ‘for di porta di cushina’ y a pidi e placa pa e salanan di operacion den e presupuesto supletorio. Awor, na 2017, e ta bolbe bin Parlamento pa pidi placa pa e salanan di operacion.
Importante den e caso aki ta cu di e forma aki gobierno ta aumenta e gasto total di e proyecto cu mas di 30%, sin mester di aprobacion di Parlamento. Esaki ta algo cu e Parlamento nobo no por acepta sin mas, y pa e motibo aki a yama minister Schwengle pa duna cuenta. Ademas e Parlamento nobo kier sa con ta bai paga pa e huur adicional aki, pues kiko e implicacionnan financiero ta riba termino largo y corto.
E reunion aki ta tuma lugar diaranson 1 november 2017, 10or mainta den Parlamento
Attachments area