Oranjestad – Algun dia pasa e potret aki a wordo manda pa nos, pa analisa. Mes ora e a haya nos atencion.
Si un accidente sosode, con serio e consecuencianan lo ta?
Ariba e foto, nos por wak dos cilinder di gas, “los” pues nan no tawata mara asina nan no move. Nos a bay busca mas informacion.
Prome cos cu a wordo bisa na nos ta cu, “No tin un ley, cu ta prohibi un persona transporta cilindernan di gas den nan auto”. Pues pa awor mucho lo no por wordo haci. E siguiente ta informacion cu Aruba Native a compila for di un investigacion haci.
Peligernan
Tur dia ciudadanonan ta cumpra gas di e manera aki of kizas bo mester tin un pick up, pa asina transporta e cilinder pa su destino. Pero, no tur hende tin un pick up.
Imagina, un accidente fuerte, caminda pa x motibo un auto dal cu velocidad halto tras di e auto aki.
Un chispa, y bo lo haya un explosion cu casi sigur resultado fatal.
Si ta den aire liber no ta un problema, tanten e no haya “algo” pa e por cende. Ta djies cere y ta cla.
Un otro scenario ta, si un di e cilinder tin un leak y pa mala suerte bo a bay cende un cigaria den e auto, lo por causa un explosion cu por ta fatal tambe.
Si bo ta basta ora den e auto y e cilinder ta leak, e ta bay mandabo flauw y bo ta bira malo door di a inhala tanto gas.
Na salida di Arugas mayoria biaha nan ta pone un “tapa” di plastic pa por si acaso e boter habri e gas no sali.
Lo ta hopi bon, pa Gobierno sinta hunto cu departamentonan concerni y wak con lo por hinca un ley den otro, pa asina por proteha e ciudadano di un incidente cu lo por ta fatal.
Mester concientisa e comunidad di e peligernan, momento cu bo ta bay transporta un cilinder full di gas.