Home Politics Formador Evelyn Wever-Croes a bishita Gobernador FORMACION TA BAYENDO BON, KEDANDO...

Formador Evelyn Wever-Croes a bishita Gobernador FORMACION TA BAYENDO BON, KEDANDO CLA CU E PROGRAMA DI GOBERNACION

SHARE
ORANJESTAD – Formador Evelyn Wever-Croes a reuni cu Gobernador pa duna reportahe di e proceso di formacion manera a keda acorda diamars ultimo.
Na su salida sra Wever-Croes a informa prensa cu e proceso di formacion ta bayendo bon, y partidonan ta mas avansa cu e programa. Probablemente lo keda cla cu e programa den e sigiente dianan.
Mientras tanto ta cuminsa cu e fase di reparticion di cartera. Pa cu esaki sra. Wever-Croes a indica cu den e reparticion di cartera mester refleha e resultado di eleccion cu ta 9-2-1. Cu esaki formador kier ilustra cu no ta asina cu un partido ta pone mas awa den biña cu otro partidonan, sino mas bien ta trata pa yega na un reparticion mas balancea posibel cu ta refleha e resultado di eleccion.
Formador a duna un splicacion tambe di e proceso di screening, den cual algun instancia mester duna un reportahe di e candidato pa minister. E candidato tambe mester suministra informacion pa e formador por evalua. Despues di un evaluacion, formador lo hasi e proposicion na Gobernador cu lo tin e ultimo palabra. Pues tin un caminda ainda pa cana prome cu yega asina leew y prome cu un hende por bisa cu e ta bai bira minister.
“Mi sa cu henter Aruba ta ansioso pa conose nos gobierno nobo, sinembargo mi ta bolbe pidi un tiki mas di pasenshi. E negosacionnan ta bayendo bon y esaki a resulta den e prome señalnan di e cambio: un parlamento den cual MEP POR y RED ta forma mayoria, y den cual AVP ta den oposicion. Y culmina pa e presidente di parlamento nobo den persona di sr. Guillfred Besaril di MEP y vice presidente sr. Andin Bikker di POR. Awe nos por mira e prome señalnan caba, ya nos por cuminsa sinti e cambio. Pabien Aruba!” Segun Evelyn Wever-Croes