Home Local E berdad tras di Circle K

E berdad tras di Circle K

SHARE

Circle K ta un establecimiento bon conoci na Aruba pa mas di 25 aña. Ken no a yega di bay cumpra algo na Circle K den oranan di madruga?! Sin embargo, despues di 25 aña di operacion, Circle K a hay’e forsa door di autoridadnan pa cera su portanan temporalmente. Den e siguiente paragraafnan nos lo duna un relato detaya di e razonan pakico esaki a sosede.

Circle K a wordo habri 25 aña pasa como un 24/7 convenience store. Un minimarket semper bon surti pa por brinda servicio na su clientenan tur ora di dia y anochi. Bo tin un gathering na bo cas y ijs a caba anochi laat? Pasa Cirle K y haya bo saco na bon prijs. Bo a caba cu bo night shift y bo mester cumpra bo lechi cu beleg? Pasa Circle K y nos semper lo t’ey pa atende bo. Bo ta cuminsa traha 6am pero kier dal un pastechi y cumpra bo corant prome? Nos tambe t’ey…cualkier ora di dia of anochi.

Durante añan nos tur a custumbra y te hasta a depende ariba e servico 24/7 di Circle K. Sin embargo door di e maneho di tolerancia di nos autoridadnan pa cu actonan ilicito cometi den e area di Rancho, Circle K tambe a haya un fama menos bunita. Mayoria di biaha cu un fechoria tuma lugar den Rancho, Circle K su nomber ta aparece den prensa. Toch, Circle K semper a copera cu cuerpo policial. Tanto asina cu na peticion di Polis, Circle K a instala camaranan di seguridad pafo di e establecimiento pa asina Polis por tin acceso ora ta necesario. Siendo Circle K e unico minimarket habri den oranan nocturno, Polis a haya cu ta bon pa por wak kico tur ta pasa riba e caya banda di Circle K ora cualkier incidente sosede den Rancho.

Tur cos tawata cana bon te dia 25 di December 2015, ora Polis Eric Ras a dicidi cu mester cera Circle K despues di 12am. Segun Ras, Circle K a opera ilegalmente pa 25 aña pero t’e ta e persona cu a bin constata esaki supuestamente. Mientras tanto, durante e 25 añanan di existencia, Circle K a pasa door di 3 diferente propiertario sin interupcion. Solamente a dicidi cuminsa cu haci problema, cu e ultimo doño cu ta esun cu mas a inverti den e lugar. E argumento di Sr. Ras ta cu Circle K ta e actor y promotor principal di e fechorianan cu ta tuma lugar den Rancho, y na lugar di pone man duro riba e malechornan pafor, ela prefera di pone tur e carga negativo ariba e establecimento.

Un deseo di e maneho di e gobierno e momento ey, tabata pa tur comerciante den Centro di nos Ciudad, upgrade nan mes pa asina nos tur duna un man na mihora producto Aruba. Circle K logicamente a tuma e deseo aki hopi na serio y a upgrade su exterior y interior considerablemente implementando entre otro “Pop art” den su exterior cu a lift e imagen di full e vecindario. Invercionan considerabel a wordo haci pa aporta na e mihoracion di producto Aruba, cu e esperanza tambe cu asina nos Cuerpo Policial tambe aporta di su banda eherciendo man mas duro riba e malechornan den e area. Sin embargo esey no a resulta di ta Sr. Ras su prioridad. Su enfoke tabata sera Circle K.

Manera 2016 a habri, e frecuencia cu autoridadnan tabata stop e operacion nocturno di Circle K a aumenta. Cu e intencion di pone tur cos na ordo, Circle K a sinta na mesa cu Minesternan di Algemene Zaken, Salubridad, Economia y Husticia y a bay di acuerdo pa trece e permisonan anticua (cu pa 25 aña no tabata un problema) up to date pa asina por retoma e operacion usual. Mientras lunanan tabata pasa pa por haci esaki, Circle K tabata perde placa ya cu e operacion principal di Circle K ta nocturno. Mas leu ainda, a pesar di cu e autoridadnan concerni a duna un prmiso temporal pa por sigi opera mientras cu e papelnan ta cana nan caminda, toch Polis, na mando di Sr. Ras, a sigi haci bida di Circle K dificil door di bisa cu e permiso temporal, firma door di 2 minsiter, no tin valides. E tabata hasta comico pa wak con Polis ta sconde tras di mata di kwihi pa warda wak si Circle K ta cera su portanan 12am. Te hasta tabata bin un rato depues di cu Circle K a cera pa wak cu flashlight den e establecimiento sin tin hende a keda aden ainda pa habri bek. Mare tabata tin un perseverancia asina pa combati e ladronan y dealernan pafo. Sin duda algun e ordo di Sr. Ras tabata bon cla: Circle K no mag habri bek; esey ta nos prioridad! E actitud aki a haci cu varios empleado a perde nan trabou y mas capital mester a wodo injecta pa por tene e establecimento habri.

Seis luna despues e permiso actualisa por fin a keda cla. Adicionalmente, mester a haci invercionan adicional pa por a cumpli cu rekisitonan cu 25 aña pasa no tabata existi. Unico cu a keda pendiente e momento ey tabata e firma di Minister van Algemene Zaken pa por habri 24/7 atrobe; manera a wordo palabra 6 luna pasa. Sin embargo, Circle K a haya otro baño di awa frieu: “E firma pendiente di Minister van Algemene Zaken no por wordo duna pasobra e presion di Polis (Eric Ras) pa mantene e establecimiento cera den oranan nocturno ta mucho grandi…”

Lunanan a pasa na unda a hiba varios conversacion cu ministernan y tambe cu Sr. Ras. A bin resalta cu tur e persona of instancianan envolvi tawata sconde tras di otro: “Ami no tin problema. Si departamento X bisa cu ta OK, ami tambe ta bay mee akkoord”. Y asina ela keda draai den un circulo vicioso na unda Sr. Ras a keda cu e ultimo palabra.

Na December 2016 a tuma luga un reunion entre e socionan di Circle K, Sr. Ras, Sr. Richardson y Sr. Soemmers. E reunion aki a tuma luga na Centro di Husticia (Santa Cruz). Un reunion hopi ameno na unda Sr. Ras a bin cu e briyante idea di laga Circle K habri bek 24/7 pa un “trial period” di 6 luna sin bende alcohol despues di 9pm. Doñonan a sali satisfecho di e reunion sabiendo cu lo bay por habri Circle K bek 1 di Januari cu su actividadnan normal. Sin embargo no tabata sa ainda cu esaki lo a resulta di ta un otro farsa; e biaha aki di cuerpo policial (Sr. Ras cu a bin cu e idea, pero e mes no a cumpli cun’e).

Lunanan a sigi pasa y Circle K keto bay perdiendo placa. E moral di e empleadonan cu a resta a cay te na vloer ya cu despues di tanto aña ta traha amenamente pa Circle K, di repente un Polis ta dicidi di cambia e “rules of the game” y instancianan superior ta opta pa wak otro banda.

Durante e periodo cu Circle K a keda opera te cu 12am, hopi ladronicia a tuma luga. For di un principio Circle K no a wordo traha y of ekipa pa tin oranan cera. Semper e tabata habri (24/7). Esey a haci cu ora a wordo forsa pa cera 12am, no tabata tin niun tipo di seguridad. Teniendo tambe na cuenta e maneho di tolerancia pa cu e malechornan den e area ey, Circle K a bira un presa facil. Ladronan a cuminsa pa kibra glas di porta y drenta horta. Despues cu ijzerwerk a wordo pone na e porta, a opta pa kibra bentana y drenta. Ora e bentanan a wordo tapa cu plywood a opta pa kibra kandal di porta di hero y drenta. Den otro palabra, no tawata tin forma pa por controla e ladronan den e area.

Mientras cu a busca un security guard pa para pafo (ya cu e bentanan di e negoshi no tabata duna pa un security guard; al contrario, empleadonan mester a wordo kita for di trabou) a haya un personsa pa drumi den e establecimento. Sin embargo esaki no a dura mucho ya cu e ladronanan tabata kibra den Circle K asina mes y menasa e persona drumi. E ora a bin cu otro solucion: e doño mes lo keda den Circle K madruga, cu luz cendi (haciendo trabounan administrativo), pa asina e ladronan no cay den e tentacion di drenta horta. Esaki a resulta di ta un bofta den cara di Cuerpo Policial. A yega un Polis cu palabranan hopi insultativo e incorecto menasando e doño cu e si e no paga luz y bay drumi e lo wordo deteni. E doño a responde den un tono masha trankil y cortes cu e no por paga luz pasobra e ladronan lo probecha y drenta horta atrobe; e ta prefera di wordo deteni contro su boluntad prome cu e laga e barco zink sin capitan a bordo. Aki a wordo demostra cu e dicho “lo cortes no quita lo valiente” ta hopi berdad. E polis no a haya otro solucion mas cu cana bay lagando solamente un monton di palabra malo atras.

Un luna despues no a resta e accionistanan otro solucion mas cu cera Circle K completo y manda e empleadonan cu a resta cas. Ladronan a sigi kibra y horta pero sin haya nada pasobra ya tur cos a wordo saca. Polis (Sr. Ras) a logra su meta di cera Cirle K y laga tur e ladronan free for all den nan teritorio di tolerancia. Comerciantenan a perde nan inversion, clientenan no tin e oportunidad di haci nan inkopen nocturno y e bario ta continua den su decadencia custumbra. Circle K tabata refugio pa hende cu tabata na punto di wordo atraca. Circle K tabata esun cu ta yama Polis pa asistencia ora den e zona tabata tin problema. Dus cera e negoshi no a mihora e siguridad di e area y e persistencia cu a uza pa caba cu Circle K ta leu di esun cu mester aplica ariba e criminalnan di e zona.

E preguntanan cu ta keda den aire ta:

Kico ta e interes di e autoridadnan pa silencia e actividadnan den e zona?
Dicon autoridad no ta controla e area y ta crea un sfer saludabel pa e negoshinan di e bario?
Pakico 5 minuut prome cu razia, tur hacido di maldad ta somenta?
Pakico cubri e actonan ilicito den e area bisando cu ta antisocialnan (choller) ta haci esaki mientras cu esnan tras di e criminalidad aki ta gruponan bon organisa?
Pakico otro establecimentonan similar pero sin permiso rond di nos isla si ta wordo tolera pa bende productonan despues di 12am y Circle K cu pa 25 aña ta bende cu su permiso, awor no por mas? Na unda e preferencia ta sinta?
Dicon durante 25 aña di e negoshi no tabata tin problema y di ripente ora doño nobo a haci inversion den lugar y a duna bek den e comunidad (marketing, advertising, servicio social, etc) a dicidi di cera e lugar? E doño nobo di algun manera tabata un menasa pa e criminalnan y crecemento di negoshinan ilicito?

Hopi pregunta, niun contesta. E doño no ta perde speransa cu e Gobierno nobo lo ta uno mas serio den su maneho y pro-comercio.