Home Politics Prioridadnan di comunidad ta enfoke central di acuerdo ‘Hunto pa Aruba’

Prioridadnan di comunidad ta enfoke central di acuerdo ‘Hunto pa Aruba’

SHARE

Den e acuerdo di formacion ‘Hunto pa Aruba’ lider di cada partido esta sr. Otmar Oduber, sra. Evelyn Wever-Croes y sr. Ricardo Croes a firma y asina acorda pa riba tres prioridad y punto di salida pa e periodo di gobernacion 2017 – 2021.

Bon Gobernacion

E prome punto ta encera e calidad di nos democracia y nos institutonan democratico ta depende di un structura transparente basa riba: proteccion di derechonan humano, respet pa e necesidadnan y libertadnan di nos ciudadanonan, fortificacion di nos estado di derecho y instancianan di control y responsabilisacion y bon gobernacion, eliminacion di corupcion y discriminacion. Pero mas cu tur, democracia di nos pais y bon gobernacion ta depende di e capacidad y integridad di esnan cu ta ocupa posicionnan clave den e structura y institutonan. Gobernantenan ta responsabilisa nan mes pa nan actonan y funcionamento den e aparato gubernamental. Den esaki Parlamento mester cumpli debidamente cu su tarea di controla gobierno. Ademas lo institui un departamento pa promove integridad gubernamental (‘Bureau Integriteit’).

Finansas Publico Balansa y Duradero

E di dos prioridad cu partidonan MEP, RED y POR a acorda den e acuerdo di formacion “Hunto pa Aruba”  ta Finansas Publico Balansa y Duradero. Meta principal ta pa den un forma responsabel trece un balance den nos finansas publico pa awo y pa nos futuro generacionnan. Pa logra esaki lo reduci nos debe nacional na un nivel manehabel, lo baha e gastonan innecesario y lo restructura e sistema di impuesto (reforma fiscal) pa esaki bira uno mas simpel pa ehecuta y mas husto pa e pagado di impuesto. Esencia di e reforma fiscal ta pa reduci e peso di impuesto, di directo pa indirecto, cu e meta di entre otro logra mehora poder di compra, eficiencia y transparencia. Pa garantisa transparencia y efectividad di e procesonan financiero lo institui un ‘Begrotingskamer’.

E Ser Humano Central

E di tres prioridad ta enfoca riba ser humano. E ser humano y su derechonan fundamental lo wordo poni central den e maneho di e proximo gobierno y esaki lo ta visibel principalmente riba e siguiente terenonan Siguridad, Asistencia Social, Bienestar Economico, Desaroyo Sostenibel, Enseñansa di calidad, Cuido di Nivel Halto y Vivienda pa Un y Tur.

Tur e puntonan di enfoke den e acuerdo ‘Hunto Pa Aruba’ por relata na e visionnan cu a wordo presenta den POR su plan di Gobernacion y cual ta cuadra tambe cu locual cu partidonan MEP y RED tambe ta para pe. Puntonan cu ta garantisa e cambionan y adelanto cu comunidad kier mira na bienestar di un y tur.