Un debe di 206 miyon dollar a ser reduci te na 110 miyon dollar!
Awe 11 di october ta recorda cu 15 aña pasa ex-Premier Nelson Oduber y ex-Ministro di Finanzas Nilo Swaen a yega na un acuerdo na Italia cu e General Manager di SACE, Giorgio Tellini pa loke ta e debenan di garantianan hotelero (Beta, Ramada y Plantation) di 206 miyon dollar (370 miyon florin) cometi pa e gobierno di AVP durante 1986-1988.
Curashi y determinacion
E debe di 206 miyon dollar aki Gabinete Oduber a hereda na momento di drenta gobierno na final di 2001 y esaki a base di un sentencia di Corte Internacional na Den Haag y cual debe mester a ser paga inmediatamente (‘uitvoerbaar bij voorraad’) na e compania SACE.
Tabata danki na e curashi y determinacion di nos ex-ministernan Nelson Oduber y Nilo Swaen, kendenan no a perde pa gana y cu urgencia a bay Italia, caminda nan a yega na un acuerdo cu SACE pa logra reduci e debe di 206 miyon dollar te na 110 miyon dollar y di cual 55 miyon dollar mester a wordo paga cash na maart 2003 y e resto durante 15 aña largo na un suma di 5.1 miyon dollar (9 miyon florin) pa aña y cual e ultimo pago lo mester ta dia 31 di maart 2018. Tur esaki debi na un gobernacion iresponsabel di aventureronan, cu manera ex-Minister Hulandes Jan de Koning (dfm) a yega di declara, cu e garantianan a wordo regla y otorga door di ex-Premier y ex-lider di AVP Henny Eman sinta y bebiendo un kopi di koffie cu e Italianonan.
Pesadiya no a termina
Cu firmamento di e acuerdo na Italia dia 11 di october 2002 a yega un fin tambe na loke ta bay den historia como e aventura di mas grandi di siglo pasa, esta e dealnan mafioso cu a wordo cera cu e Italianonan di parti di gobernantenan di AVP. Pero e pesadiya no a termina ainda ya cu despues di e ultimo pago di e garantianan na maart 2018, entrante otro aña pueblo lo mester bay paga tambe pa tur e debenan nobo di e proyectonan PPP (Hospital, Green Corridor, Watty Vos Boulevard) y esaki durante 25 aña largo na un suma di mas di 60 miyon florin pa aña.
Sin duda cu e ex-ministronan Nelson Oduber y Nilo Swaen a haci un tremendo trabao e tempo ey ya cu nan a logra scapa Aruba un pago di casi 100 miyon dollar na beneficio di nos pueblo. Un danki di nos pueblo siguramente ta na su lugar pa loke nan a haci 15 aña pasa na Italia!