Oranjestad – Colegio di supervision financiero di Aruba ta considera cu alcansa e normanan presupuestario pa 2017 y e añanan posterior ta di gran importancia pa reduci e debe publico di Aruba y haci finansa publico sostenibel. Esey Raymond Gradus a afirma durante su prome bishita na Aruba como presidente di CAft. Pa 2017 ta necesario pa vigila strictamente cumplimento di e medidanan proponi pa reduci e deficit di financiacion. Pa motibo di e resultadonan di e prome semester CAft ta preocupa pa e ingresonan decepcionante y e gastonan creciente. Banda di esey durante su bishita CAft a insisti pa entrega mas pronto posibel na Parlamento e presupuesto di 2018, den cual a tene cuenta cu e norma den LAft di un surplus di 0,5% di e PIB.
Presupuesto di 2017 bou di presion
Den e prome semester Pais Aruba a realisa un deficit di 1,6% di e PIB. E surplus di e sector colectivo, excluyendo Pais, segun e pronostico di Aruba lo alcansa 0,1% di e PIB pa henter 2017. Esaki ta nifica cu e deficit di Pais Aruba mester baha di 1,6% di e PIB pa 0,6% di e PIB den e di dos semester di 2017. Kiermen cu Pais Aruba ta enfrenta e reto pa realisa un surplus di 1,0% di e PIB (alrededor di AWG 50 miyon).
Aunke realisacion di impuesto riba salario y di impuesto riba volumen di benta (BBO) na mita di aña ta mas halto cu e ingresonan den e prome semester di 2016, toch nan ta atrasa respecto e presupuesto. Pa algun partida di gasto tambe por constata un patronchi di gasto mas rapido cu den e ultimo añanan. E ingresonan fiscal atrasa ta debi parcialmente na e retraso den e trabounan rond di reapertura di e refineria.
E ingresonan fiscal atrasa di e aña aki ta ocasiona ademas un riesgo pa e presupuesto di 2018, ya cu Aruba, conforme LAft, mester alcansa un surplus di financiacion di 0,5% di e PIB na 2018. Sin ingreso fiscal cu ta atrae capital fuertemente lo bira precario -no solamente na 2017, sino particularmente tambe na 2018- pa cumpli cu e norma. CAft ainda no a ricibi un proyecto di presupuesto di 2018 di Gobierno. Durante su bishita CAft a insisti pa entrega e presupuesto di 2018 mas pronto posibel na Parlamento, pa por aproba e presupuesto na tempo. Esaki ta di importancia en relacion cu e programa de prestamo.
Importancia di finansa publico sostenibel
Alcansa e normanan di presupuesto ta importante pa reduci debe publico. E carga masivo di debe ta eherce hopi presion riba finansa publico di Aruba. Pa motibo di e carga di debe halto combina cu tasanan di interes relativamente halto e carganan di interes anual ta un partida di gasto masha halto pa gobierno di Aruba. Ta importante pa Aruba pa baha tanto e carganan di interes como e cuota di debe. E bononan di gobierno refinancia na 2017 ta un paso den e bon direccion pa esey, ya cu a cera esakinan na un tasa di interes mas abou. Pero bahamento mas aya di e cuota di debe y carganan di interes mas abou asocia cu ne ta necesario pa hiba finansa publico na un caminda structuralmente sostenibel. Na 2018 mester dal un prome stap den direccion di un surplus presupuestario structural cu un surplus di 0,5% di e PIB. Incluso despues di 2018 un surplus ta necesario pa realisa un mehoramento mas aleu di debe publico.
Norma di deficit alcansa na 2016
A base di e proyecto di cuenta anual CAft ta conclui cu na 2016 -cu un deficit di 1,8% di e PIB- a cumpli cu e norma di deficit legal di 2,0% di e PIB. E proyecto di cuenta anual ainda ta na Controlaria General di Aruba pa su conseho. Posteriormente CAft lo emiti un conseho tocante e cuenta anual. Riba e cuenta anual aki no a aplica ainda e control di accountant. Aruba ta stipulando un trayecto pa den futuro yega na un control di accountant di e cuenta anual. E trayecto aki lo mester conduci na cu lo por otorga e cuenta anual di 2020 un certificacion (aprobatorio) di accountant. CAft ta enfatisa e importancia di un cuenta anual controla pa e accountant.
Bishita di CAft cu presidente nobo
E bishita di dos dia di CAft na Aruba tabata e prome bou di liderazgo di e presidente nobo Raymond Gradus. CAft ta consisti awor di Raymond Gradus, Robert Croes y Sybilla Dekker. E presidente nobo ta mira atras na un bishita fructifero na Aruba. CAft a tene combersacion regular cu Gobernador, Ministro di Finansa demisionario, Conseho di Ministro demisionario y e Comision di Finansa, Asunto Economico y Organisacion Gubernamental di Parlamento. Banda di esey CAft a haci bishita na, entre otro, Banco Central di Aruba, Conseho Consultativo y Aruba Ports Authority.