Tanki Leendert – Diabierna atardi pa mas o menos 5:30 polis a wordo manda cu urgencia na altura di Rococo Plaza, pa un auto cu lo a bolter.
Mes ora un cantidad di unidadnan policial ariba caya a bay e sitio.
Na e yegada di polisnan, nan ta constata cu niun auto a bolter. Loke nan a topa cune tawata un Toyota Supra shinishi kibra contra un pick up.
E chauffeur ainda tawata sinta den e Toyota y por a nota cu ela haya golpi na cara.
Ambulance a wordo pidi, pero pa un of otro motibo esaki no por a presenta e momento eynan. Despues di basta warda ambulance a yega.
Na e sitio nos a compronde cu e Toyota Supra un auto cu un motor basta sofistica biniendo di pariba, lo a perde control.
Manera ta wordo yama ariba caya, posiblemente e tawata “Bari Mop”.
Durante esaki e chauffeur a perde control completo y ta baha caminda, dal e pick up cu tawata staciona eynan.
Un impacto sumamente fuerte, caminda cu e la pusha e pick up lante, pone dal e garoshi di bende cuminda.
E chauffeur di e Supra lo a dal su cara ora di e impacto, stuur wiel a kibra tambe, indicando con fuerte e incidente tawata ta.
Un cabayero cu su famia y yiunan net a caba di move nan auto, pa para un poco mas pabou sino ta algo hopi mas serio lo por a pasa.
Nos a compronde cu e auto su documentonan lo no tawata na ordo, akinan ta caminda cu polis a laga takel e auto y hibe warde.
Despues di bastante rato ambulance a yega pa trata e chauffeur y hibe hospitaal pa chekeo medico.