E cara di Kali Kushner di 21 aña por wordo mira tur caminda, riba Instagram, no pa motibo cu elo a haci algun cirugia raro of a crea un wenkbrouw straño pero Kushner su fama riba medionan social ta danki na su tratamento di Acne, e potretnan di before and after ta completamente diferente.
E potretnan ta saca durante e tratamento di dos aña cu ela tuma pa Acne, cu yama Accutane. Den e dos añanan aki ela haya mas di 22 mil followers riba Instagram. E idea no tabata pa e haya popularidad riba instagram, pero tabata djes pa por a tene na cuenta con e progreso di e tratamento tabata bayendo.
Segun Kali, semper e tabata tin poco Acne for di tempo cu e tabata bayendo scol, pero den na 2014, ela haya un brote feros di Acne, cu a cubri full su cara, ela trata na haci tur cos pa evita esaki pero no por a logra controla e Acne, e no por a usa niun make up y su dermatoloog a prescribi antibiotica, pero nada no tabata yuda.
Despues di un aña cu tabata tin berguensa y tabata tristo, paso e Acne no kier a kita, ela bay papia cu su Dermatologo y ela a prescribi Accutane pe. Accutane tabata manera un pildo milagroso, despues di algun siman usando Accutane, e Acne a cuminsa bay y su cara a cuminsa claria.
E side effectnan si a molesti’e un poco, manera cuero seco tur caminda y esaki tabata pone grawata henter dia, especialmente e cuero seco na su lomba tabata strobe di lanta for di cama, e tabata dura 10 minuut pa djes lanta for di su cama.
Asina ela keda pone constantemente potretnan di su cara cu Acne, con e acne tabata bayendo y tabata haya hopi reacion di hendenan cu e mes no conoce, cu tabata stimul’e pa sigui. Segun kali e no a haci nada otro cu ta bebe e pildo Accutane y saca hopi selfies pone riba su instagram.
Kali ta splica cu hopi hende no ta na altura di con of di kiko Acne ta bin, tin hende cu tin e pensamento cu ta paso un persona lo ta fies y no lo ta laba su cara, elo a haya Acne, esaki ta completamente robes. Acne ta bin di hormonanan, sucu di curpa y door di genetica. Tin hende ta pensa cu personanan cu tin Acne no lo ta worry cu nan cara of no ta haci suficiente pa cuida nan cara, esaki tambe ta completamente fout.
Kali a caba su tratamento di Accutane y ta usando hopi vitamina C y un dermaroller, pa un aña caba y esaki a reduci mayoria di e marcanan mas profundo cu e brote di Acne a laga atras.
Kali sa cu ta geneticamente ela haya acne y tin biaha e tabata mas y tin biaha e tabata menos, pero e ta pidi tur hende cu tin acne pa no tin berguensa di dje, paso bo persona bal hopi mas cu bo acne.
E nomber farmacuetica pa Accutane ta Isotretinoin, hopi dermatologonan ta prescribi e pildo aki como un pildo milagroso pa acne. Semper en cuando, Si un persona kier cuminsa cu un tratamento asina, ta bon pa papia cu su dermatologo prome. Mayoria di biaha na cabamento di e tratamento e acne ta bay, pero semper mester tene cuenta cu no tin garantia, den cierto casonan ta existi acne cronico y e effectonan di e acne riba terminonan largo, sin lubida cu e tratamento tambe tin su side effectsnan.