Caya G.F. “Betico”, Croes – Dialuna mainta den careda di 11’or autoridad a wordo notifica di un atraco y cu e dos atracadornan lo ta ariba un scooter.
E atraco a tuma luga den caya grandi, unda antes tawata Wimco, of tambe pariba di Wulfsen & Wulfsen.
Den caya nos a haya e siguiente informacion di un testigo.
Un dama di un tienda grandi di pañanan pa deporte den caya grandi, lo ta e victima.
Aparentemente e lo a bay banco of lo ta biniendo bek di banco y aki ta e momento cu dos atracador, un lo a keda ariba e scooter y e otro a bay comete e acto.
E lo a benta e dama abou y choke pa ranca loke e ta buscando. Lo ta trata di dos homber flaco, segun e testigo nan tawata tin e helmnan bisti, pues lo no por a wak e caranan.
Ora ela caba ela subi e scooter y hunto cu e otro nan a bandona e sitio.
Nan lo a ser mira altura di Kentucky esta den Hendrikstraat, pero polisnan ariba caya no a logra haya nan.
Pues aki nos ta wak cu den dia cla y dilanti tur hende, atracadornan ta comete nan actona, manera nada un pasa.
Area marca ta unda e atraco a tuma luga.