145
San Nicolas- Diasabra algo prome cu 3’or y mey di marduga un patruya di polis ta wordo pidi pa bay na altura di Baranca bar, pa un homber cu lo a wordo menasa pa un grupo di Rasta.
Un rato despues Centraal di Polis ta bolbe pidi pa un patruya, paso e mesun homber a yama Centraal di polis, y a splica Centraal cu un homber cortico, color cla, cu un carson preto y un flanel blanco tabata tin un arma di candela y a los un tiro cu esaki
Mesora Chef van dienst y e patruya di San Nicolas a bay na e sitio y a topa cu un grupo di 15 homber y 6 muher. Tambe e homber cu a wordo describi un rato prome, cu lo tabata tin un arma di candela den su man. Ela wordo ristra y no a topa cu niun arma, despues tur cu tabata na e sitio a wordo ristra , e grupo di homber a cuminsa lanta cu e agentenan policial na e sitio. E Chef van dienst na e sitio a hala nan atencion y a mustranan kiko ta e consecuencianan. Flex Team a bay na e sitio pa asisti e patruya di polis, pa asina yuda core cu tur e hendenan cu tabata para ey dilanti.
Un persona a acerca e agentanan policial y a bisanan cu ainda tin hopi hende den Baranca Bar. E Chef van Dienst di districto San Nicolas a purba drenta den Baranca Bar, pero e porta tabata na lock y niun hende no kier a habri e porta of sali pa papia cu e Chef van Dienst di e districto di San Nicolas.
Tambe polisnan a buska bou di e auto staciona y den e area pa un arma di candela pero sin resultado.
Un rato despues centraal di polis ta avisa e patruya di San Nicolas cu na altura di Chesterfield tin un pelea andando pero ora e patruya di San Nicolas a bay no a topa cu niun hende.
Na altura di American Bar nan a topa cu un grupo di persona bou influencia y tambe a manda nan bay for di e sitio. Un chauffeur cu a core den verboden a keda deteni pa core auto bou influencia.