Francia – No ta secreto cu e imagennan di modelonan hopi biaha ta wordo “retouched”, o sea ge-photoshopped. Creando un curpa cu curvanan bunita, slank, pianan ta wordo haci mas largo manera manequin y tambe pa suavisa na cuero, hasta nan wowonan ta wordo cambia.
Pues loke e publico of miho bisa loke mundo completo ta wak den revista no ta cuadra cu realidad.
Na Francia cuminsando diadomingo 1 di oktober, tur imagen comercial di un modelo cu a wordo altera digitalmente pa mustra flaco, lo a haya un etiketa mescos cu ta aparece ariba pakinan di sigaria.
“Photographie retouchée”, esaki kiermen cu e foto a wordo ge-edit.
Esnan cu no mantene nan mes na e ley nobo lo por haya un multa di €37,500 of 30% di e costo pa a crea e comercial.
Di e manera aki gobierno kier trata na frena e problema cu tin, esta cu personanan cu kier cambia nan curpa na proporcionnan cu no ta realistico.
Ta spera cu e cambio lo yuda baha e delgades extremo entre modelonan y tambe problema cu e imagennan aki ta trece cu nan. Pa esnan cu ta aspira formanan di curpa falsifica via un programa di computer.
E manera aki ta evita cu hobennan ta bay haci tur loke ta nan alcanse pa yega na e midinan cu no ta realistico, sin sa cu nan ta haciendo daño na nan salud, asina e minister di salubridad Marisol Touraine a declara.
Mester bisa cu e desicion aki ta uno hopi bon, paso e cos aki ta bin ta pasa tur parti di mundo.
Den e era ultra moderno aki di technology, te hasta ariba bo Android of Iphone bo ta cambia bo curpa y bo cara.