UPP a tuma nota di tanto e discursonan di Benny Sevinger y di Mike Eman na un evento politico algun dia pasa, cu ta yena cu un aire di segregacion y hasta sentido di desunion, na momento cu ta haci promesanan abiertamente na e grupo di desendencia Latino djis pa hiba un politica di populismo.
Nos di UPP kier a enfatisa aki cu nos como partido ta contra e politica di segregacion aki. P’esey nos ta contra di tur tipo di eventonan asina, na unda cu di un forma of otro ta dirigi na idioma Spaño, siendo cu aki nos mester reconoce cu nos ta un comunidad y cu Papiamento ta nos idioma. Cu e evento aki, y den e forma cu el a wordo hiba, ta acentua cu aki na Aruba tin segregacion. Cu tin un comunidad di “Nos” y di “Nan”. Y cu e tipo di actividad aki no ta hiba nos ningun caminda, sino di uno di destabilisacion y di confrontacion.
Nos ta haya hopi lamentabel cu tin mas partido tambe cu ta haci esaki na momento cu ta dirgi nan mes na e comunidad Latino. Nos ta kere cu nos Papiamento ta asina bunita, pa nos haya politiconan cu ta degrada nos Papiamento, y cu ta pone nos pensa cu nos Papiamento ta inferior. Y papiando Spaño den e caso aki, no ta yuda na nada pa nos yega na un integracion real di tur e comunidadnan cu ta biba riba nos isla. Esaki no ta e caminda cu nos tin di bay. E comunidad cu nos crea, mester ta uno di “NOS”, y cu nos, nos kiermen nos tur. Mester bin cu leynan cu hustamente ta yega na integracion di tur esnan cu ta biba aki na Aruba. Asina so no por yega na e comunidad uni cu nos ta papia dje, e hogar cu yama Aruba.
Banda di e leynan estricto di integracion, nos mester percura tambe pa bin cu re-introduccion di e modelo Suizo. Esaki por wordo considera como e salbacion di nos pais, sigur mirando e capacidad di carga, cu ya a yega su limete. E Swiss model aki lo encarga su mes cu e.o. pa rem e crecemento pa motibo di migracion di na Aruba. Cu e Swiss model aki lo no tin posibilidad di “gezinshereniging” cu tambe a wordo priminti durante e encuentro aki dor Benny Sevinger. Algo cu casi tur partido tambe ta primintiendo, djis pa e bentaha electoral. Pues ta wordo priminti cu lo por trece tur famia bin biba aki na Aruba. Asina p.e. na IPA durante e foro politico pa studiantenan, nos a tende for di maestro- y futuro maestronan cu ya caba e cantidad di muchanan cu tin den klas ta hopi grandi. Aki caba nos ta mira un prome efecto y problema, na momento cu nos sigui cu un politica di admision asina.
Tambe ta bon pa bisa, cu abase di e tratado di “Family Life”, lo no por stroba “familiehereniging” pafo di un modelo Suizo. Si nos bay riba e informacion cu Otmar Oduber a duna poco dia pasa ey cu lo tin como 10.000 persona indocumenta aki na Aruba, cu ya caba eynan por nifica cu pa medio di e maneho aki nos lo por haya, na un averahe di 4 persona pa famia, un 40 mil persona cu lo por aplica pa un derecho asina. Tur esaki ta pisa na e capacidad pa scolnan, y tambe riba AZV mes.
Den e Swissmodel, lo bay tin e elemento di screening di tanto pasado criminal y tambe di malesa contagioso y cronico. Loke na e momentonan aki no ta wordo haci mas.
P’esey nos ta diferencia nos mes di e partidonan otro cu si ta para pa un mihor sistema di admision por medio di e modelo Suizo aki. Y dia 22 di september ABO lo por bisa no na tipo di manipulacionnan asina. ABO por yuda determina e capacidad di carga di nos pais. Esaki na bienstar di e progreso di nos pais. P’esey bo opcion ta lista combina PPA/UPP, lista nr. 2, color Kaki.