Historia y cultura ta un yabi pa desaroyo sostenibel di un pais. Ultimo añanan nos a mira un tendencia peligroso pa cambia historia di nos pais, specialmente pa cu e lucha pa nos Status Aparte. Gobierno di MEP lo institui un Comision Nacional cu amplio representacion pa publica e historia real riba base cientifico, cu lo wordo incorpora den curiculo na nos scolnan.
Tur pais desaroya y mayoria pais cu tin turismo como un di su pilarnan principal di economia, tin un plan nacional di cultura bon stipula. Aruba tambe tin su plan nacional di cultura desde 2006 caba, yama ‘Integraal cultuurbeleidsplan’. MEP lo sigui implementa nos plan nacional di cultura manera tabata e caso te cu 2009.
Nos meta ta pa hobennan haya oportunidad pa participa gratis riba un escala grandi na actividadnan cultural, pa asina desaroya nan habilidad y talento riba tereno di arte y cultura. Y pa asina logra un pueblo feliz cu tin un satisfaccion grandi di sa kico ta nos identidad, nos idioma, nos cultura y nos historia.
PROPOSICION pa eleva e calidad y desaroyo di nos producto cultural
- Promove actividadnan cultural den tur skina di Aruba pa conscientisa nos pueblo cu nos cultura y identidad ta primordial, pa nos kere den nos mes y pa nos por sigui progresa como hende.
- Tene cuenta cu nos comunidad multicultural y duna oportunidad pa cera conoci tambe cu e cultura di e diferente paisnan cu un representacion na Aruba.
- Envolve henter nos comunidad multicultural, pa participacion di hoben y adulto den e proceso di cultura, sin importa nacionalidad y duna instancianan cu tin e tarea y responsabilidad pa desaroyo di cultura, un sosten financiero relevante, pa yuda implementa e maneho cultural di Aruba.
- Instala un Conseho di Cultura (Raad van Cultuur) cu mester revisa implementacion di e maneho cultural y duna feedback na Ministro di Cultura, Departamento di Cultura y directiva di organisacionnan gubernamental y no-gubernamental.
- Stimula instancianan cultural (e.o. museonan, parke nacional etc.), artista y artesanonan pa alcansa un producto cultural-turistico a base di identidad propio y cu un calidad di produccion na nivel internacional.
- Planea y ehecuta mas investigacion riba tereno di cultura pa por mehora e calidad y e producto cultural.
- Duna atencion na e Dianan Internacional riba tereno di Cultura y Naturalesa, y pone mas enfasis na nos fiestanan cultural nacional, cuminsando na scol.
- Introduci den e centronan di bario, un sistema di actividadnan cultural cu guia special pa hoben, tambe pa tin espacio pa artistanan cu experiencia y expertonan local, regional y internacional traha cu hobennan den proyectonan despues di scol, manera e proyectonan Arte di Palabra y Gang di Arte.
- Garantisa continuacion di iniciativanan particular, por ehempel Festival di Dande, Festival di Himno y Bandera, Fiesta di San Juan Dera Gay etc.
- Amplia e sosten profesional dirigi mas riba e necesidad di nos Centronan di Bario, Clubnan den bario y otro grupo y instancianan cultural.
- Introduccion di dianan di districto, a base di un estudio pa fiha e fecha conmemorativo pa cada districto, y lo wordo celebra cu actividadnan recreativo popular y cu manifestacion cultural.
- Institui un Comision Nacional cu amplio representacion pa publica e historia di pais Aruba, specialmente e lucha pa nos Status Aparte, riba base cientifico, cu lo wordo
incorpora den curiculo na nos scolnan.
“Historia y cultura ta un yabi pa desaroyo sostenibel di un pais. MEP lo sigui implementa nos Plan Nacional di Cultura”.
22 september, duna nos bo voto di sosten pa asina hunto nos logra e satisfaccion grandi di tin nos identidad, nos idioma, nos cultura y nos historia.