SAN NICOLAS- Dilanti un audiencia di coleganan, miembronan di Parlamento, stakeholders y demas invitado Prome Minister Eman a papia riba e proyecto piloto di cultivo di algae. Tur cu a hiba palabra tabatin solamente elogio pa e tremendo trabou haci cu por a yega asina leu cu ta habri e laboratorio pa cultivo di algae riba tereno di Refineria di Aruba na San Nicolas y na mes momento ta proba na mundo eyfo cu nos por recoge CO2 y converti esaki den un cultivo di algae. Esaki ta un proyecto conhunto entre TNO, RDA, CITGO y gobierno di Aruba. Un proyecto cu ta den desaroyo danki na insistencia di Prome Minister Mike Eman. Despues di discursonan e sigui apertura di e laboratorium y museo cu ta banda di dje.
Den su discurso Prome Minister a recorda con su gobierno den nomber di Reino Hulandes a firma e acuerdo riba cambio di clima na Paris. “Firmando e acuerdo aki nos a tuma responsabilidad como pa ta lidernan y pa percura pa e obhetivonan di mundo wordo realisa. Esaki ta encera cu e paisnan cu a firma mester baha nan emision di CO2 considerablemente den e añanan nos dilanti. Pa garantisa cu e temperatura mundial lo subi solamente cu 1,5% den e siguiente añanan. Esaki ta exigi conversion di e sistemanan con nos ta produci energia, conversion di sistemanan tecnologico pa baha emision di CO2 y pa asina mundo por bira un lugar mas sigur den decadanan nos dilanti.” Eman a bisa cu pa hopi cambio di clima ta algo teoretico, pero cu no ta asina.
Eman a conta di su biahe recien pa Sint Maarten unda el a keda masha impresiona pa e situacion devastador cu el a encontra eynan, causa pa horcan Irma. “Ni un cas a keda sin haya daño, hospital, companianan, scolnan y demas edificionan tur a keda afecta. Tur splicacion cu nos a haya di tur hende cu nos a papia cu nan, ta cu tin un corelacion directo entre e condicionnan malo di tempo cu ta afectando mundo y cambio di clima.”
Eman: “Tur esaki ta indica claramente cu e responsabilidad cu cada un di nos tin pa preserva mundo, ya no ta uno teoretico mas. Nos tin e responsabilidad humano pa cuido e mundo cu nos Creador a duna nos. Durante e ultimo añanan Aruba a accepta su responsabilidad pa loke ta e reto enorme aki, aunke cu nos como isla chikito no ta produci tanto CO2 pa haci daño na mundo, Aruba tin e capacidad pa bin cu cambionan cu por sirbi como inspiracion pa otro paisnan grandi. Ta pesey cu ora e proposicion di reapurtura di e refineria a bin dilanti, tabatin un condicion hopi fuerte. Esaki tabata cu e refineria mester wordo limita den su emision di CO2, door di opera riba gas natural . Pero tambe, cu si tin mes emision di CO2, cu nos lo crea tecnologia, podise como frontrunner den mundo, pa recoge e CO2 aki. ” Eman a bisa cu e ta haya credito pa a pone e condicion, pero ta Minister de Meza y su team negociador encabase pa actual Minister Richard Arends ta merece tur credito pa a convence e partnernan pa esaki por a sosode.
“Awe nos por celebra asuntonan importante. Nos por celebra e echo cu e isla chikito aki ta cana dilanti den produci ehempelnan tangibel con por converti energia convencional den energia sostenibel. Mi ta garantisa boso cu a 2020 nos ta 100% sostenibel riba tereno di energia. Ni con duro esaki por ta, nos ta percura pa e sosode. Na tur conferencia unda e tema cambio di clima ta riba agenda, semper e pregunta ta bin dilanti con por recoge CO2 y use pa otro metanan. Den mundo no tin un tecnologia industrial cu a proba con recoge CO2. E isla chikito aki probablemente lo brinda e evidencia cu e por sosode. Nos no por ta mas cu orguyoso cu Aruba ta bay bin cu e evidencia cu CO2 por wordo recoge y bira parti di un economia circular cu por provee hopi trabou y un medio ambiente mucho mas limpi. Nos tur aki por ta orguyoso di a tuma e pasonan gigantesco aki.”