Esaki ta un di e rasonnan cu mi a dicidi cu ta basta, mester por bin un cambio den nos maneho di e fondonan di deporte y e prioridad cu mester wordo poni na nos hubentud. No por ta cu awe na aña 2017 ainda mi tin cu para mira clasnan di scol cu mester sali riba veldnan di “stof” mita di dia pa asina nan por haya deporte na scol. Con ta posibel cu nos a inverti tanto placa den infrastructura y edificionan luhoso pero a lubida nos mesun yiunan cu mester haci deporte den solo y no tin ni un luga adecuado pa cambia paña, baña of haci nan necesidad. No tin ni awa pa nan bebe. Nos gobernantenan ta sinta den un cocolishi ultra moderno y den aire fresco cu a costa miyones pero no tin placa pa un simpel gimnasio den un scol. Mi por compronde cu cada gobierno tin nan prioridad cu nan vision pero ta inaceptabel cu den nan vision no tin nos hubentud, nos deportistanan aden. Awe un biaha mas EPI ta sclama pa un luga adecuado pa nan por haci deporte, EPI tin 22 aña ta warda pa nan gimnasio y nada, pero nos ta pronkia cu tin luz di led, klinker y asfalt tur caminda. Banda di EPI, John Wesley College, Abraham de Veer School y Reina Beatrix School, tin hopi mas cu NO tin un sala pa haci gym/deporte. Nos ta grita cu tin un problema serio di obesidad, diabetis y curason pero no ta percura cu tin un facilidad adecuado na tur nos scolnan pa asina cuminsa combati esakinan desde inicio. Falta di maneho y vision ta haci cu awe ainda nos ta confronta cu un situacion cu por a wordo regla facilmente. No por y no mag acepta un situacion asina mas. Den e maneho di deporte di POR nos lo percura na prome luga cu tur scol tin un lugar of tin acceso na un lugar na unda nan por wordo instrui den movecion y deporte. Mescos cu nos clasnan ta rekeri airco nos scolnan tambe mester salanan cu tur e modalidadnan pa por instrui nos hubentud. E ta gobierno su responsabilidad na prome lugar pa percura pa esaki y cu tambe tin instructornan prepara y tur material necesario pa asina nos por proteha nos hubentud y motivanan pa cu nan salud. Prome cu sigui inverti den proyectonan millonario, mester percura pa nos facilidadnan ta optimal, inverti cu resultado. Mi curason semper tabata den school sport y ta lastima cu net esaki nan a laga cay. Cu bo voto nos por bira e situacion y percura pa nos scolnan ta debidamente prepara pa asina nos no pasa un aña mas cu nos muchanan mester haya deporte den solo.