Leerplicht a wordo introduci pa hobennan di 4 pa 16 aña di edad mester sigui un enseñansa obligatorio. Si e alumno no sigui un enseñansa mane ta stipula, mayornan por encontra nan mes cu un boet entre Afl 250,– pa Afl 2500,–.
Den rapport di SER “Drop-outs op Aruba” di juli 2016 ta señala: cu e implementacion di e ley pa locual cu ta trata tuma accion contra personanan cu no ta cumpli cu leerplicht, no ta regla ainda. Pa cual no por tin consequencia y/of sanacion posibel. Door di falta di ley y instruccion, leerplichtambtenaar den varios ocasion no por eherce nan trabou mane debe ser. Como cu leerplichtambtenaar no tin autorisacion pa por ehempel impone sancion of boet, e situacion ta hasi cu no por obliga e mayornan pa percura cu enrealidad nan yui ta sigui un scol. Pa es motibo leerplichtambtenaren den varios ocasion ta wordo menasa door di mayornan.
Aserca tin un falta di colaboracion entre bureau leerplicht y imigracion, unda cu tin control na frontera si un hoben tin autorisacion di scol pa sali for di Aruba durante periodo di scol. Pa medio di tecnologia moderno por introduci un colaboracion entre bureau leerplicht y imigracion, unda cu por duna di conoce si e alumno tin permiso pa sali for di Aruba durante period di scol.
Tin diferente facilidadnan cu ta afecta cu hobennan no ta cumpli cu leerplicht. Facilidadnan cu mester di antencion y un maneho structura. Transporte ta un di e facilidadnan cu mester di un maneho mas amplio entre minister di enseñansa y di transporte.
Tin varios bario cu unda e hoben ta biba un distancia leu di un bushalte. Si un alumno den un situacion menciona no haya transporte trempan pa jega bushalte na ora, e oportunidad ta grandi cu e ta perde e dia di scol. Un solucion pa e problematica menciona ta, door di manda un shuttle (minibus) trempan busca e alumnonan y baha nan na ora na bushalte. Mester ta consiente cu mester percura cu despues di ora di scol un shuttle tuma mesun ruta den oranan di atardi. Si no e hobennan cu ta biba leu di e bushalte ta haya nan ta cana un distancia largo. Den cual, tin hoben cu ta cana rond di un ora pa jega nan cas. Cual cu tin un influencia negativo momento cu nan tin cu cumpli cu nan tarea. Un otro situacion ta pa falta di scol den barionan. Esey ta pone cu nan yui tin cu bay scol den otro bario.
Como cu leerplicht su structura no ta forma completo, ta hasi cu e ley actualmente ta morto. Pa medio di mehora e ley y facilidadnan cu ta influencia leerplicht, leerplicht lo haya bida y funciona pa cual e a wordo implementa.
Pasobra e meta di leerplicht ta pa evita drop-outs y garantisa educacion pa cada mucha na Aruba.