Un di e ministronan cu a percura pa un desaroyo sumamente positivo pa loke ta nos industria di turismo ta ex-Minister di Turismo y Transporte, ing. Edison (Eddy) Briesen. Sr. Briesen desde e eleccion 1983 te cu eleccion 2013 a aparece riba lista di MEP. Sinembargo a yega asina leu cu e aña aki Eddy a dicidi di retira for di politica activo, pero siguramente e lo sigui duna su consehonan valioso y sosten incondicional na su partido cu tanto e ta stima, esta MEP.
Pa recorda e echo historico aki di e 34 aña den politica, partido MEP a prepara un bunita ceremonia dedica na sr. Edison Briesen y cual ceremonia lo tuma lugar durante un magno evento musical y politico den e districto di San Nicolas diadomingo awor 10 di September. E sitio lo ta na Bernhardstraat 257 (Cede di Chris Romero) y lo cuminsa pa 6’or di atardi te 10’or di anochi.
Partido MEP ta invita y conta cu presencia di henter comunidad Arubano y specialmente e pueblo di San Nicolas pa presencia e bunita homenahe aki, como muestra di gradicimento y aprecio pa tur loke sr. Briesen a significa pa e industria di turismo Arubano.
