ORANJESTAD – Durante e anuncio pa lansamento oficial di servicio di WiFi gratis den Caya G.F. Betico Croes, nos Prome Minister Mike Eman a comparti ultimo desaroyonan pa loke ta e estimulo comercial di e area den nos centro di ciudad. E mandatario ta sinti, y ademas ta wak cu comercio ta tumando stapnan concreto den direccion di tuma iniciativanan propio pa yuda rebiba nos Caya Grandi.
Eman ta kere cu finalmmente e diferente encuentronan di reflexion cu sector priva y e esfuersonan haci di parti di gobierno, ta cuminsa duna su fruto. Propietarionan di edificio y comerciantenan ta wak cu, haciendo e cambionan necesario den mentalidad y structura fisico, tin un potencial grandi pa tap den dje.
“Conceptonan nobo unda ta bay ofrece hospedahe caminda e espacionan den di dos piso ta combirtiendo den camber, apartamento y condominio y esaki ta trece un grupo importante di persona cu lo keda move den caya y ta trece un contribucion hopi grandi,” asina Eman a bisa. Despues di e fase di renobacion y awo esun tecnologico cu WiFi y Sound System, Caya Grandi ta bay conoce un di tres fase relevante cu ta esun caminda ta maximalisa e espacionan existente.
Prome Minister Eman ta wak cu pronto edificionan lo cambia di retail pa horeca treciendo un ambiente completamente diferente. Asina hendenan cu ta bin pa horeca ta bay pasa den e tiendanan pa haci compras of e hendenan cu ta bin pa haci compras por pasa na e luganan di horeca pa un momento agradabel den contexto familiar. “Esey ta tur e infrastructura cu nos a bin ta creando akinan,” Eman a indica.
A finalisa bisando cu “Nos ta hopi combenci cu Caya Grandi lo bira e exito grandi cu nos a idea. Nos tur tin cu traha riba dje, sector publico y sector priva den un sociedad pa haci esaki posibel y tur e facilidad cu ta wordo poni ‘in place’ pa haci’e posibel.” A keda anuncia emesun dialuna mainta aki cu prome cu fin di aña lo finalisa e trabounan di instalacion di sistema di zonido, pero tambe ta cuminsa cu lonanan grandi cu lo cubri parti mey mey di caya di un edificio pa otro, pa brinda asina ainda mas sombra na bishitantenan y crea e ambiente di un centro comercial.