Home Uncategorized Accident semi frontal na Ponton, cu dos persona herida

Accident semi frontal na Ponton, cu dos persona herida

SHARE

Ponton: Diamars pa mas o menos 11’or di anochi, polis, brandweer y ambulance ta wordo manda cu hopi urgencia riba e caminda di Ponton pa playa, un poco mas panort di Hua Run Supermarket, unda un  accidente basta serio a tuma lugar.

Na prome instante a drenta e informacion cu ta un auto lo a dal contra un palo di lus, pero despues a bin sali na cla cu tabata trata di un accidente frontal entre un Suzuki Baleno berde y un BYD blanco. 
 
E Prome unidad cu a yega na e sitio tabata un unidad di brandweer, pa motibo cu lo a haya informacion cu un di e autonan ta sacando huma.
 
Na e sitio e chauffeurnan  tabata dunando diferente declaracion. Pa e motibo aki a pidi pa presencia di departamento di trafico, cu tin e experiencia den e ramo aki.
 
Un ta bisa cu e auto berde a subi caminda y e esun blanco a dal e y e berde ta bisa cu e ta bayendo direccion nort y e auto blanco a hala na su man robes y dal semi frontal hopi duro mes contra nan.
 
Den ambos auto tawata tin un persona herida. Dos ambulance a presenta y despues di a tratanan na e sitio a transporta ambos persona, un dama y un hoben pa hospitaal. 
 
Takelwagen mester a hala e autonan for di caminda, mirando cu nan no por a move ariba nan propio forsa.