Home Uncategorized Trahando pa nos grandinan por sigui move Clientenan di Cas Funari contento...

Trahando pa nos grandinan por sigui move Clientenan di Cas Funari contento cu proyecto di movemento

SHARE

ORANJESTAD, Aruba: Fundacion Lotto pa Deporte hunto cu Minister di Salud Publico, Cuido di Nos Grandinan y Deporte, Dr. Carlos “Alex” Schwengle a realisa e proyecto di movemento y a haci esaki hunto cu Cas di Funari y Fundacion Facilidad Deportivo. A enfoca riba hendenan grandi, specialmente esunnan cu tin reto fisico. A bin cu un gym banda di Funari, esta “Savaneta Be Fit”. Esaki tanto clientenan di Cas di Funari, Huize Maris Stella y Centro di Bario Savaneta por haci uzo di dje.

 

FLpD ta contento di a sostene e proyecto aki, unda cu nos grandinan por haci uzo di e Savaneta Be Fit, asina Presidente di FLpD, mr. Di-Stefano Wernet RA a duna di conoce. E proyecto aki ta pa tur hende, hoben y hendenan grandi. Tur hende di Savaneta ta bon bini pa haci uzo di e facilidad aki. Haci deporte y movecion ta saludabel.

 

Director di Cas di Funari, Sally Dacosta a duna di conoce cu e edificio a keda hopi nechi y e clientenan tabatin hopi aprecio pa loke Minister di Salud Publico, Cuido di Nos Grandinan y Deporte, Dr. Carlos “Alex” Schwengle y Fundacion Lotto pa Deporte a haci pe bario di Savaneta. Nan estado di salud fisico ta hopi importante tanto pa Cas di Funari como e persona mes. Cu esaki tin un balor agrega pa nan den nan actividad diario, unda cu nan por sigui move, mantene nan “gewricht” den movecion. “E proyecto aki ta hopi great”.

 

Catarina Nierop ta un boluntario na Cas di Funari desde 1972 y a splica cu Cas di Funari antes tabata un scol, cual ta esun di mas bieu di e bario. Cas di Funari a bira un fundacion oficial na aña 1979 y a bin cu e fundacion ora cu a tende cu tin hopi hende grandi na cas cu no ta haci nada y tabatin e necesidad pa pone nan bou encargo di otro persona. Asina a cuminsa unda tabata busca e hendenan grandi na cas, unda cu a cuminsa antes den e scol y despues a bay den e cluster cu ta e edificio di awendia. Prome tabata haci algo 1 biaha pa siman, pero despues a haya mas boluntario y a cuminsa traha mas dia. A dura hopi tempo prome cu e luga por a bira den e fundacion di awe. Na aña 1987, SAR Reina Beatrix a habri Cas di Funari bek.

 

Irene Yarzagaray ta biba den Huize Maristela y e ta contento cu e proyecto aki. Tur dia den oranan di mainta y atardi e ta haci uzo di e facilidad di e gym di Funari. “Mi ta sinti hopi orguyoso, pasobra mi a baha hopi peso”. Irene Yarzagaray ta un persona cu ta sufri di curason y riñon, pa e motibo aki e mester a baha peso y a haci uzo di e gym. E proyecto aki ta algo hopi bon pa Savaneta y el a invita tur hende pa compañ’e pa haci uzo di e gym.

 

Parlamentario Clarisca Velasquez, a bishita e gym nobo di Savaneta y a contento cu esaki. E ta haya cu e proyecto aki ta uno bon pa esunnan cu ta bin Funari di tur parti di Aruba. Pa cu e proyecto aki tur hende di e bario por haci uzo di dje pasobra tin hopi facilidad cu por haci uzo di dje pa mantene e movecion. E ta apoya gobierno pe proyecto aki y a gradici Gobierno, Minister Schwengle y Lotto y tur esunnan cu por a yuda di un forma of otro den e proyecto. Tur persona di Funari tabata contento y cu nan por haci uzo di e gym pa asina tene nan curpa den movecion.