ORANJESTAD, Aruba: “E hecho cu nos ta para aki awe ta netamente pa ilustra un di e teamnan cu a haya masha atencion di Gobierno e ultimo añanan”, asina Minister di Husticia, mr. Drs. Arthur Dowers a duna di conoce diaranson mainta para pafo dilanti Strandpolitie na Palm Beach. Hunto cu su colega di partido Robert Candelaria, a elabora riba e programa di partido pa e periodo 2017-2021 pa cual ta bayendo eleccion awor.
Papiando di Strandpolitie, Minister Dowers a accentua cu a ubica mas Polis na e post ey y ta evaluando pa den e temporada halto di turismo, pa aumenta e cantidad di Polisnan mas ainda. Ta importante pa splica cu na Strandpolitie no tin solamente Polis uniforma pa patruya, pero tambe tin recherchenan pa specificamente atende cu ciudadanonan of turistanan cu a haya nan mes den problema y kier haci un denuncia.
E programa di AVP ta contene varios aspecto, pero por consider’e un programa “interdelanta”. A percura pa tur aspecto di e programa aki tin como efecto, cu e lo mehora e calidad di bida di ciudadanonan, cu enfoke riba nan siguridad.
Entre e temanan principal ta atende cu asunto di hobennan den comunidad, nos a mira e ultimo añanan cu eynan tin basta risico. A tuma pasonan cu sin duda lo tin como consecuencia cu lo influencia e comportacion di e hobennan di forma positivo. Y caminda cu hobennan desvia, nos lo por atende cu nan den forma cu nan lo rehabilita y regresa den comunidad.
“Pa loke ta trata e risiconan cu nos ta core den comunidad, nos ta realisa cu nos ta coriendo dos risico grandi, di hendenan cu ta bin di afo pa comete crimen y e otro ta prevencion”, asina Minister Dowers a splica. El a amplia cu e prome, Aruba tin e cifranan di mas halto den solucion di casonan criminal den henter e area aki y den Reino Hulandes. Den e parti preventivo, ta haciendo tur posibel pa cera nos fronteranan pa hendenan no desea no drenta. Ta implementa reglanan mas estricto pa hende por drenta nos isla, pa cual a nota un caida den cantidad di hende no desea purbando pa bin Aruba pa keda den forma ilegal.
Pa e grupo di hende cu ta purba drenta den forma clandestino, Minister Arthur Dowers a enfatisa cu a percura pa intensifica e presencia di Kustwacht na costanan, uzando su avionnan, helicopter, su 7 botonan, hunto cu Boto di Polis, ta añadiendo un radar acerca pa aumenta bista riba lama. E mandatario a conta cu awor aki caba Polis y Kustwacht tin hende mirando e radar 24/7 pa garantisa siguridad.
Di otro banda, Ministerio Publico den su maneho nobo ta persiguiendo esunnan cu ta facilita e ilegalnan na Aruba, yudando nan cu luga di keda, auto, ideanan unda pa horta, etc. E castigonan pa esey ta traha den forma preventivo pa hende no presta nan mes na e tipo di negoshinan asina.
Esakinan ya ta forma parti di e maneho di Ministerio di Husticia pa e ultimo añanan, pero awor mas reenforsa ainda den e plan di gobernacion pa e siguiente 4 añanan.