ORANJESTAD, Aruba: Riba e prome dia di e siguiente modulo di e estudio di nursenan cu ta specialisando como P.O.H-ers, Minister Dr. Carlos “Alex” Schwengle a bay bishita tur e cursistanan pa desea nan exito. Ta trata aki di un opleiding unda nursenan den funcion caba trahando den diferente instancianan, ta scoge pa haci un specialisacion como P.O.H.
Minister di Salud Publico, Cuido di Nos Grandinan y Deporte, Dr. Carlos “Alex” Schwengle a bishita e di dos grupo, pasobra e prome grupo a caba algun luna pasa y ta trahando caba na diferente consultorio di dokternan di cas. E di dos grupo di nursenan ta studiando como “Praktijk Ondersteuning Huisarts” (P.O.H-ers), pues ta specialisa den cuido y guia di pashentnan cu enfermedadnan cronico.
Pe añanan cu ta bin, ta concentrando riba enfermedadnan cronico, specialmente pe parti di diabetes pero tambe esunnan cu tin risico cardiovascular. AZV ta encarga cu e estudio, den cooperacion estrecho cu Breederode Hogeschool Rotterdam di Hulanda. Den aña 2018, Aruba lo conta cu entre 20 pa 24 nurse specialisa den cuido y guia di pashent cronico, specialmente esunnan cu ta diabetico.
E grupo falta un curso mas y loke cu nan falta ta cardiovascular, di cual e curso aki lo tuma luga otro aña na Januari. Asina cu keda cla lo pone un praktijk ondersteuning pa 2 dokter di cas y esaki ta nifica cu P.O.H-ers lo haci mita dia na un dokter di cas y e otro mita dia na un otro. E P.O.H-ers ta resorta bou di AZV y Wit Gele Kruis y ta forma parti di un structura integral di profesionalnan, cu ta cuida y guia un persona cu tin diabetes. Cu tempo nan lo haci esaki cu otro enfermedad cronico, pero pa awo nan lo ta tratando e enfermedad di diabetes.
Meta di e grupo di nursenan aki ta pa concentra nan mes riba e parti di informacion y educacion di e pashent diabetico, riba kico e enfermedad aki ta y con pa biba cune. Tambe pa yuda e pashent acepta su enfermedad cronico y tambe siñ’e con pa yuda su mes cu e enfermedad aki. E enfermedad aki ta cronico, e ta parti di bo persona y una bes cu bo tin diabetes bo mester siña biba cun’e den e forma corecto. Pa asina bo por tin menos complicacion posibel.
E tarea principal di e nurse POH ta pa traha den prevencion secundario pa evita complicacionnan na momento cu bo tin diabetes. Esey lo percura pa tin menos bishita na Eerste Hulp, menos opname y menos interna den hospital, menos uzo di remedi y pashentnan ta keda vital pa mas aña den nan bida y por aporta miho na nan mes pero tambe na comunidad.
Minister Dr. Schwengle ta premira cu e gastonan den sector medico lo baha pa atende cu e enfermedad di diabetes y cu e pashent por keda vital y por aporta na comunidad pa un periodo mas largo. Na final di dia ta loke cu bo kier den e parti di bo maneho den Gobierno ta pa cu e ciudadano ta mas saludabel posibel. Via un bon salud e ciudadano por sinti mas contento posibel cu su mes tambe den su comunidad.