Home Uncategorized Minister di Salud Publico, Cuido di Nos Grandinan y Deporte, Dr. Carlos...

Minister di Salud Publico, Cuido di Nos Grandinan y Deporte, Dr. Carlos “Alex” Schwengle Gym “Savaneta Be Fit” ta adapta pa tur hende haci uzo

SHARE

ORANJESTAD, Aruba: Cas di Funari a ricibi nan propio gym y esaki ta bou di e nomber di “Savaneta Be Fit”. Minister di Salud Publico, Cuido di Nos Grandinan y Deporte, Dr. Carlos “Alex” Schwengle y Fundacion Lotto pa Deporte a traha hunto pa por a traha e gym pa Funari. E idea pa tin un gym na Cas di Funari tabata di basta aña caba. Tur hende tabata contento cu e facilidad nobo, unda cu awo nan por haci ehercicio.

 

Como Minister di Salud Publico y Deporte, e tabata kier a aporta na salud di tur hende pero tambe pa hendenan grandi y esunnan cu tin un incapacidad fisico. A dicidi di bin cu un facilidad unda cu tin hopi aparato hunto y ta duna e posibilidad pe hendenan train. Tambe pe tin un bon uzo, pasobra no por pone na un caminda unda cu e accesibilidad no lo bay ta bon.

 

“Akinan ta ideal, pasobra patras di dje tin e Centro di Bario cu por haci uzo di dje”, e mandatario a expresa. Banda di e gym tin Cas di Funari, di cual tur siman y tur dia tin clientenan di diferente edad, pero tambe e hendenan cu ta den rolstoel. E facilidad nobo aki por acomoda tur hende. Esey ta significa cu no pasobra bo ta den rolstoel bo no por train, pero e aparatonan ta adapta. Patras di e gym tin Maris Stella y nan tambe tin acceso na e gym, unda cu nan por yega cu e lider di actividad y por haci uzo di e facilidad. Door di train e parti fisico, e tin un efecto positivo y ciudadanonan lo por biba mas largo. Nan lo bay ta un tiki mas saludabel y nan lo ta un tiki mas no fisicamente pero tambe mentalmente mas miho door di e actividad fisico.

 

Hopi biaha tin hende ta rindi pasobra nan ta sinti cu por ehempel nan schouder ta bira stijf, ta gasta y ta kere cu no por haci nada mas. Pero si nan por pasa door di e dolor, unda cu training ta yuda e schouder ta los bek. Esey ta e idea tras di e inversion y e localidad aki. Esaki no ta completamente cla, pasobra ainda mester pone e klinkernan y cera e luga cu heki pa purba di evita vandalismo.

 

Minister Schwengle a pidi tur hende, specialmente pueblo di Savaneta pa cuida e proyecto aki pasobra e ta pa tur hende uza. “Pa loke ta e inversion ta bin di nos mes y e ta un inversion pa nos mes y kico nos ta gana door di destrui”, e mandatario a duna di conoce.

 

E inversion haci den e facilidad aki ta pa un uzo extensivo, pa un grupo grandi y e idea pa un mantencion pa un tempo largo. Lotto y Gobierno a yuda financia e gym, pero DOW y FFD lo percura pe mantencion. Esunnan cu lo bay haci uzo mas di e facilidad ta Funari, Maristela y Centro di Bario. IBiSA tambe lo por haci uzo di e facilidad, aunke cu e proyecto no ta completamente cla. Awo ta bezig cu e grupo di sport instructor pa haci uzo di nan pe parti di atardi, pero mester stipula e schema di ki ora pa ora pa asina duna instruccion na e hendenan cu kier haci uzo di aparatonan corecto.