Secuestro di botonan y esnan abordo
Ayera den oranan di mainta aparentemente militarnan Venezolano lo a secuestra 4 boto di Aruba y esnan abordo tuma como rehen.
Gasolin barata di Venezuela
Aparentemente e botonan aki cu frequencia lo tabata bay Venezuela, na Cabo San Roman of Puerto Escondido pa cumpra gasolin na un prijs hopi mas barata y lo ta trece Aruba.
25 mil dollar placa di rescate, cu e militarnan venezolano ta exigi
Probablemente nan lo a laga tres hende bay Aruba cu un boto, cu e condicion cu nan lo bin Aruba pa buska placa, pa asina por paga pa rescate di 5 hende y 3 boto cu lo a keda tras, sigur cu lo ta un suma di 25 mil dollar, y cu e condicion cu nan lo trece e placa e mesun atardi mes, sino lo tin chens cu nan lo likida tur 5 persona cu nan lo tin como rehen.
Situacion na Barcadera
Esnan cu a yega Aruba, tabata tin miedo pa duna informacion paso nan no tabata kier pa e caso aki sali na cla. Na yegada nan a bin topa cu varios recherche na Barcadera, ta ser papia cu lo tin menor di edad entre e rehennan. Famianan henter atardi te anochi laat tabata sinta na e pier pabou di Waf di Barcadera, wardando ki ora e botonan di nan sernan keri ta drenta.
Famianan ta hopi precupa
E famianan di esnan cu ta rehen na Venezuela ta hopi precupa pa nan sernan keri, aparentemente tin famianan cu lo a bay na e consulado Venezolano na Aruba, cu peticion pa e consul intermedia pero sin resultado, e militarnan a keda cu nan exigencianan.
Chens cu lo por cuminsa likida e arubianonan
Esnan cu a bin buska e cent tabata hopi precupa paso si nan no bay bek ayera tardi cu e cantidad di dollar cu e militarnan ta pidi, e chens ta grandi cu nan lo por cuminsa likida e arubianonan cu ta rehen.
Gobierno di Aruba
Aparentemente Gobierno no a ricibi un denuncia oficial, pero si ta na altura di loke ta pasando, segun un vocero di gobierno cu e localnan ta sigui bay venezuela tur dia cumpra gasolin, maske nan sa cu e negoshi di gasolin aki, no ta wordo aprecia di parti di gobierno, y ta bisa cu e consecuencianan ta pa nan mesun cuenta.
Gobierno di Reino ta desconseha viaha pa Venezuela
Na varios ocasion Gobierno di Reina a desconseha di viaha pa Venezuela, pa tur cu ta biba den Reino Hulandes pa evita di bay Venezuela, paso e situacion ta hopi peligroso. Asina mes hopi arubiano tur dia ta sigui viaha pa Venezuela.
Supuesto placa di rescate entrega na un socio di e militarnan
Aparentemente e Arubianonan cu a regresa Aruba, pa buska e placa di rescate, lo a entregue na un Venezolano ayera tardi mes, posibelmente asina cu e persona aki a haya e cent den su poder elo a notifica e militarnan cu tabata tin e Arubianonan como rehen y lo laganan den libertad pa asina nan por regresa Aruba, mas liher cu ta posibel.