ORANJESTAD – E conocemento y experiencia cu candidato di partido AVP Jennifer Arends-Reyes a gana den e Comision di Turismo den Parlamento ta permiti’e pa awendia e tin un conocemento hopi mas amplio di e tema, pero tambe un interes grandi pa e logronan obteni te awo y e ta haya un continuacion den e proximo termino di gobernacion ta necesario.
E candidato #10 riba e lista berde ta kere cu pa sigura cu turismo ta sigui crece den forma stabil, mester vota pa e partido cu lo realisa e pasonan di mehoracion di Producto Aruba pa sigui atrae turistanan cu entrada mas halto. Dor di enfoca riba un experiencia autentico resaltando nos cualidadnan unico riba tereno natural, cultural, ecologico y social, Aruba por distingui su mes y crea un bentaha riba e competencia.
“Nos ta convenci cu nos mester crece den calidad y no den cantidad. Pa logra esey nos hotel y restaurantnan, servicio y atraccionnan mester ta di un calidad cada dia mas halto. AVP lo stimula e “upgrading” di hotel y otro atraccionnan teniendo cuenta cu medio ambiente,” asina e candidato Arends-Reyes a bisa e publico grandi cu a reuni algun dia atras pa presentacion di e programa di partido titula ‘Padilanti 2017-2021’.
AVP ta reconoce e balor di desaroyo turistico pa San Nicolas y e deseo pa promove e establecimento di boutique hotels den areanan turistico. Areanan berde y beachnan trankil ta un parti grandi di loke ta haci Aruba un destinacion asina atractivo. AVP lo mantene y cuida esaki tanto pa naturalesa mes como pa e calidad y e atraccion di nos turismo.
Por ultimo, e candidato #10 ta kere cu tin un mercado grandi den turismo forma pa esnan cu ta interesa den excursionnan ecologico. AVP lo traha pa atrae turistanan cu ta interesa den nos raiznan cultural, nos historia y nos tradicion culinario, haciendo uso di e creatividad Arubiano.