Home Uncategorized Aruba International Pro am Golf Tournament, edicion #23 a tuma lugar di...

Aruba International Pro am Golf Tournament, edicion #23 a tuma lugar di 25 pa 27 di Augustus.

SHARE

Malmok, Tierra del Sol: E torneo di Golf, Aruba International Pro Am Golf Tournament, a tuma lugar entre 25 pa 27 di augustus, esaki tabata e di 23 edicion di ‘Aruba International Pro-am Golf Tournament. Ela tuma lugar riba e prestigioso cancha di golf di Tierra del Sol Country Club & Spa.

Aruba Tourism Authority conhuntamente cu e otro patronisadornan a organisa e evento aki hunto cu e cu e expertonan di Golf di Tierra del Sol Country Club & Spa. E torneo di golf aki ta un torneo masha popular mes Internationalmente y specialmente den e paisnan di Latino America.

Aruba Tourism Authority ta haci uso di e evento di golf aki pa promove Aruba den Latino America, Estados Unidos y Europa cu cooperacion di A.T.A. su oficinanan na varios pais, ta organisa diferente torneonan cualificatorio caminda e ganadornan di cada pais ta ricibi e oportunidad di bin hunga e final na Aruba. Tur A.T.A. su oficina di Relacion Publico,  den tur mercado ta contribui grandemente y ta haci tur esfuerso pa promove Aruba den mundo di golf.

Pa e torneo aki cada ekipo di golf ta consisti di 5 golfista ,cual ta 1 Profesional y 4 Amateur. E aña aki, oficina di A.T.A. situa na Hulanda a tuma e iniciativa di invita Geert de Vlieger y Karl Vannieuwkerke pa participa na e torneo aki. Sr. De Vlieger ta un futbolista profesional Belgo cu a retira y el a bira e prome goalkeeper durante e torneo mundial di World Cup na aña 2002. Karl  Vannieuwkerke ta un reportero di deporte – Belgo y hopi conoci na Hulanda y na Belgica. Ademas di ta un presentador di television, e ta skirbi buki como tambe e ta skirbi den prensa.

Pa Tierra del Sol ta un inmenso placer pa ta un biaha mas e anfitrion di e evento aki y alaves ta yuda den e organisacion conhuntamente cu A.T.A. pa e evento di Aruba International Pro-am Golf Tournament ta un Exito. Durante transcurso di añanan e torneo a demostra su derecho di existencia y ta sigui crece. Den e calendario anual di torneonan di golf cu a tuma luga na Tierra del Sol, e torneo aki ta den top y anticipacion ta grandi den Caribe.

E aña aki e torneo ta cera cu 28 ekipo en total di e paisnan cu a participa ta: Belgica, Bermuda, Canada, Colombia, Corsou, Hulanda, USA, Inglatera, Venezuela, y naturalmente Aruba. Manera custumber e hungadonan apart di hunga golf tin un programa socioal hopi atractivo cu ta inclui brunch, dinner y fiesta di clausura cu entrega di trofeo na e ganadonan di e torneo 2017.

Apart di e aporte di Aruba Tourism Authority y Tierra del Sol, e torneo ta conta tambe cu otro companianan manera Caribbean Mercantile Bank, Aruba Aloe, Little Switzerland, Maggy’s y Cerbes Presidente.