Home Uncategorized Durante reunion cu tur agencia A.T.A. ta sigui enfoca riba obhetivonan...

Durante reunion cu tur agencia A.T.A. ta sigui enfoca riba obhetivonan di mercadeo pa cu Merca y Canada pa 2018

SHARE

ORANJESTAD – E siman aki a tuma luga reunion entre ehecutivonan di Aruba Tourism Authority (A.T.A.), A.T.A. Norte America y e diferente agencianan y companianan partner di A.T.A. pa Norte America. Representante y ehecutivonan di varios compania, ente otro e agencia di database marketing Ansira, agencia di advertising The Concept Farm, agencia di strategia di media USIM, y e agencia di PR Zimmerman Agency (Everything PR) a participa den e reunion.

 

Durante e reunionnan aki, presentacion di tur accion y tacticanan pa e mercado di Norte America pa cu aña 2018 a wordo presenta y evalua. Preparacionnan lo continua pa asina entre otro comparti esakinan cu sector priva na september. Accionnan y tacticanan ta sali di strategianan y obhetivonan general cu a wordo stipula pa Merca y Canada pa otro aña. Awor ta mas bien trahando riba detayenan.

 

Meta principal di e reunionnan aki tabata pa sigui traha riba e plan di mercadeo pa 2018, discutiendo oportunidadnan y delineando activacionnan a base mensual pa aña 2018.

 

Pa A.T.A. Aruba tabata presente e C.E.O. Ronella Tjin Asjoe-Croes, Melanie Evans-Kelly, Sjeidy Feliciano, Darice Solognier, Marilyn Feliciana, Rayon Koolman y Sherry Bidgood. Pa A.T.A. Norte America tawata presente e Area Director Ed Malone, Chris Mc Guire, Ayerim Maduro, Natasha Felix, Adwina Arendsz y Jan Wurzburger.

 

E prome parti di e reunion a wordo dedica na informacion tocante e perfil di e bishitante desea, su comportacion y desaroyo di Aruba su turismo for di Norte America recapitula. Tambe a comparti conocemento con pa miho yega na e audiencia desea durante 2018. Parti di e informacion aki a wordo presenta door di Ed Malone y djey Ansira.

 

Despues a sigui un presentacion di USIM pa cu e planificacion/strategia di media cu ta propone, a base di ‘briefing’ di A.T.A. pa 2018.

 

Atardi e compania The Concept Farm a duna un actualizacion di e produccion y e strategianan como tambe nan a presenta ideanan nobo pa lansamento di campañanan innovativo y creativo. Na su turno e agencia Zimmerman a lansa nan plan di relacionnan publico pa 2018.

 

A.T.A. Aruba y A.T.A. Norte America, como tambe e partnernan, ta satisfecho cu e intercambio y resultadonan di e reunion fructifero aki, cu ta dirigi na logra metanan pa 2018. Pa 2018 tin proyecta un crecemento di 3.6% pa Merca y 3.0% pa Canada, resultando den un cremento di 3.6% pa cu Norte America pa 2018. Claro esaki ta tene cuenta cu kier atrae esnan cu tin entrada pa por paga un vacacion na Aruba y por laga mas atras den nos economia. Tambe ta pone enfasis riba e segmento di ‘Millennials’, sin lubida e segmento atractivo y importante di ‘Baby Boomers / Empty Nesters’.

 

Aruba Tourism Authority ta sigui cu e planificacion y tin planea di lansa e campana creativo nobo na final di october, como parti di promocion pa cu high season (periodo di winter) 2017/2018.