ORANJESTAD – Na e presentacion di Programa di Partido di AVP ‘Padilanti: 2017-2021’ lider di partido Mike Eman a pone enfasis riba e mensahe cu pueblo di Aruba hunto cu AVP a haci un avance grandi pa loke ta trata progreso di e pais, y cu awo ta na un momento importante pa scoge si ta bay bek atras of ta bay padilanti den e desaroyo positivo.
Eman a inicia su discurso tumando inspiracion for di e video collage cu a precede su introduccion riba scenario e anochi aki. “E visionnan di aña 2009 na momento cu dilanti di Cas di Partido nos a bini hunto y celebra e victoria historico di partido AVP cu 12 asiento, tabata un anochi cu nos curason tabata yen di speransa, nos alma tabata brota cu speransa pasobra nos tabata sinti un responsabilidad cu nos no tin cu bay rescata nos partido, nos tin cu bay rescata nos pais y e futuro di e siguiente generacion,” Eman a bisa.
Segun e lider a dirigi na e publico den Renaissance Convention Center, e momento ey na 2009 no tabata sa con grandi e trabou tabata, “pero awenochi para akinan, nos curason ta brota atrobe cu speransa pero e bes aki cu un speransa cu certeza cu nos a demostra cu nos a haci e trabou pa por a rescata e pais aki, pa por a renoba e pais aki, pa por a renoba e barionan di nos pais.”
Aruba a mira momentonan hopi dificil prome cu AVP a asumi e responsabilidad. Hopi a pensa cu Aruba lo no por sali for di e abismo cu a haya e pais aden; ora un pais pasa den momentonan caminda bo economia ta cay cu 15%, bo turismo cu ta bo pilar principal ta cay cu 20%, cu un aerolinea asina importante manera KLM ta bandona bo isla y cu un crucero asina importante manera Carnival Cruises dicidi di no bin bo isla mas.
Adicionalmente, manera Eman a splica, e Aruba di e tempo ey tabatin barionan den deterioro, scolnan den deterioro y fondonan di pension den bancarota. Fondonan asina esencial manera e fondo di cuido medico cu tabata den un posicion asina instabil y di incertitud, cu no por garantisa e seguro di esnan enfermo, mientras cu nos pension di behes tabata den un situacion sumamente critico. Pa loke ta trata relacionna exterior, Aruba den Reino ya caba no tabata wordo respeta y Aruba den mundo tabata wordo mira como un pais cu potencial, pero cu a perde su rumbo.
Pa Eman, tur esaki a cambia for di momento cu AVP y pueblo a bini hunto na aña 2009. “Nos a marcha, nos a lucha, nos a bataya y Aruba a celebra cu Aruba a haya atrobe e timon di e pais aki den e direccion pa certitud, pa garantia y pa stabilidady awe nos ta celebra cu Aruba ta bek, Aruba tey atrobe y awe nos ta bisa Aruba Padilanti, Padilanti cu AVP, Padilanti cu e plan di AVP,” asina lider di Partido di Pueblo Arubano a expresa.