Home » Jacky van Putten, POR Gobierno ta pega porta nobo sin scharnier

Jacky van Putten, POR Gobierno ta pega porta nobo sin scharnier

by sxm
0 comment 58 views

Den e temporada di gobernacion di Gabinete Mike Eman II a bin ta renobando y trahando scolnan pa asina nos alumnonan por wordo educa den un lugar mas confortable y adecua.  Esaki ta di aplaudi pero loke si mi a bin ta nota cu no ta percura pa e scolnan tin lugarnan, gimnasio adecua pa asina nos hubentud por beneficia di deporte ya desde nan infancia. Nos ta dilanti un epidemia di obesidad y diabetis cu lo bay afecta nos poblacion den tur area. Banda cu famianan lo bay sufri cu malesanan cronico cu lo corta e calidad y tempo di bida. Banda di esaki nos costo di cuido lo bay subi alarmantemente.  Nos lachinan di lesenaar den oficina ta yena cu estudionan, analisis y datonan cu ta confirma esaki. Mi ta puntra pakico no a tuma e problema aki na raiz. A pega portanan bunita pero sin scharnier. Nos scolnan a mehora structuralmente pero no a incorpora deporte, mihor dicho facilidadnan moderno na unda deporte y movecion por bira central den nan curiculo pa asina atende e epidemia aki na e raiz.  Pesey mester revisa nos maneho di deporte escolar, mester pone scharnier na e portanan y percura cu tur scol, tanto basico como secundario tin nan propio facilidad di deporte of den un distancia cortico . Nos ta sinta den airco maneha nos pais pero ta nenga nos hubentud e derecho basico di movecion y ta laga nan riba veldnan cayente den solo y inadecua sin facilidad sanitario luga pa cambia of simplemente un water cooler. Scolnan manera e.o. St.Michael School, John Wesley College , Koningin Reina Beatrix School, EPI, Ceque College Mavo no tin facilidad deportivo.

Ta mescos cu e programa “bo bario”, otro porta bunita pega sin scharnier. Den varios compleho di FCCA nan ta wordo traha pero no ta percura cu tin un maneho di e facilidadnan aki. Minister President ta cana y kier sinti e dolor di e pueblo. Bo sa cu e dolor den e lugarnan aki hopi biaha ta simplemente no tin e recurso pa sikiera cumpra un sapato di voetbal pa asina usa e veldnan aki di yerba artificial. Mi a drenta casnan na unda no tin ni suficiente pa come, awa y luz corta  pero un tereno di bala nobies nobies. Instructornan ta contami cu muchanan ta bin pia abou pasobra no tin pa sapato.  Con nos ta bay motiva nos hubentud den e sectornan aki di menos recurso,  ta bay percura pa tin material, guia y maneho den e facilidadnan aki? Lo encarga minister di deporte, IBISA of federacionnan pa maneha y envolvi nos hobennan?  Ta sigui pega portanan bunita den “bo bario y scolnan” cu despues nan lo basha abou atrobe pasobra no tin schanier y ta warda te aki 4 aña pa lanta nan bek, verf nan, haci reunion politico pa asina laga nan cay atrobe. Falta di maneho deportivo ta un crimen riba nos hubentud, cada aña cu pasa y nan no ta envolvi cu deporte organisa, ta un aña mas cu nan salud y nan integracion social ta bay atras. Ta un aña mas cu nos ta perdiendo nan. Anto nos ta hunga politica cu nos Tesoro , nos hubentud pegando porta sin scharnier!!!

Vision di POR 2017-2021 pa cu deporte na scol lo haya un papel mas prominente den e programa di scolnan kleuter, básico y secundario y nos barionan.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio