Home Uncategorized Acto terorista na Barcelona y Cambrils, a costa bida di 14 persona,...

Acto terorista na Barcelona y Cambrils, a costa bida di 14 persona, di e teroristanan a detene 4, 5 a perde nan bida y tres ainda ta fugitivo

SHARE

Compilacion di informe y update cu a keda publica for di Diahuebs te cu Diadomingo

Barcelona: Diahuebs atardi algo pasa di 5’or, a tuma lugar un acto terorista, riba Ramblas na Barcelona, caminda un Van lo a drenta den un multitud di hende. 14 persona a perde nan bida y a laga mas di 100 otro herida.

Ramblas ta un area grandi di diverticion na Barcelona, Ramblas ta un kilometer largo y riba Ramblas auto no por pasa, e ta wordo masha hopi bishita pa turista y tambe pa localnan, no tin un dia cu ta keto riba Ramblas.

Despues di un rato ta drenta algun persona arma, den un bar restaurant Turco “Luna de Instanbul” den centro di Barcelona, no mucho leu di unda e incidente a tuma lugar. Aki polis no ta topa cu niun persona pero si nan ta topa cu un van, den e van nan ta haya un paspoort spaño.

Polis ta bin logra haya un di dos van, cu e sospechoso lo kier a usa pa huy despues di e atentado. E van aki a wordo localisa na Vic, un cuidad panort di Barcelona.

Entre e heridonan tabata tin tres persona di nacionalidad hulandes. E mesun diahuebs anochi, e presidente di e Catalonia Carlos Puigdemont a bisa cu nan a logra detene dos sospechoso, cu lo ta trata di un Marocano y un di nacionalidad spaño procedente di Nort Africa. 

E dos sospechoso nan a keda deteni na Manlleu, un lugar mas o menos 80 km panort di Barcelona, segun un corant local cu a tuma lugar un tiroteo entre polis y e sospechosonan den cual un a fayece, pero e presidente regional ta para ariba cu dos sospechoso a keda deteni.

Diahuebs anochi e grupo terorista I.S. a tuma responsabilidad di e atentado aki, maske ta conoci cu I.S. sa tuma e responsabilidad sin cu nan a hacie. Esaki a wordo haci via I.S. nan oficina di prensa Amaq.

Segun polis local, cu un homber cu a dal dos agente policial cu auto na momento cu nan a bay par’e a wordo tira y a fayece, no tin prueba cu e lo tin di haber cu e acto terorista.

Diahuebs den oranan di anochi  a bin sali na cla cu algun dia prome cu e acto terorista na Barcelona, na Alcanar a tuma lugar un explosion den cual un persona ta fayece, den e cas aki nan lo tabata traha explosivonan, un sospechoso a keda deteni, no ta sigur si por tin un relacion entre esnan cu ta traha explosivo y cu e acto terorista na Ramblas.

Varios politiconan internacional a reaciona bisando cu e acto terorista aki ta horibel. Russia ta duna incondicionalmente su apoyo na e victimanan y autoridad local. E presidente Mericano Donald Trump ta condena e acto terorista aki y bisa di cu Merca ta duna su apoyo. Premier Rutte di Hulanda ta papia di un acto di cobarde contra hendenan inocente y cu ta un dia hopi scur na un sitio unda hopi hende di tur parti di mundo ta bini hunto.

Te cu diahuebs anochi tabata papia di 3 aleman, un belgo cu a fayece, un 26 persona di nacionalidad frances ta herida den cual 11 ta grave, 3 hulandes cu a keda herida, tambe tin 4 Australiano y tres italiano den hospital.

Algun ora despues  cu e acto terorista a sosode na Barcelona, na e cuidad Cambrils cu ta keda na e parti costa tambe tabata tin un otro intento di un acto terorista, aki probablemente 5 sospechoso di e acto terorista a wordo mata, durante un operacion antiterorista, akinan un atentado terorista a wordo para na tempo, den e intento aki  7 otro persona a keda herida. Entre e 5 sospechosonan cu a wordo tira y a fayece, ta trata di Moussa Oukabir di 17 aña un di e sospechosonan principal.

Moussa lo tabata manehando e van cu a wordo usa den e acto terorista riba Ramblas na Barcelona, den cual 14 persona te cu Diabierna mainta a perde nan bida.

Diabierna mainta ta cay un detencion mas di un sospechoso di e acto terorista, esaki a tuma lugar  na e lugar Ripoll.

Un grupo di 8 pa 11 terorista ta responsabel pa e dos atentadonan aki na Barcelona y Cambrils, asina polis local a duna di conoce diabierna mainta, polis a confirma cu a detene cuater di nan y  5 a wordo tira door di polis na Cambrils durante un intento fracasa di un acto terorista.

Durante un conferencia di prensa polis a duna di conoce cu e plannan terorista di e grupo aki tabata inicialmente pa pone varios botter di gas cu explosivo den varios minivan y asina causa varios explosion, pero e plan aki a fracasa despues cu na e cas unda nan tabata preparando e botternan di gas tabata tin un explosion y e ora nan a dicidi di usa e vannan como arma pa mata hende inocente.  

E polisnan na Catalunia, ta bisa cu e terorista  Younes Abouyaaqoub di 22 aña ta fugitivo y ta e un di sospechoso di e dos acto teroristanan di Barcelona y Cambrils, aparentemente e lo por trata na crusa e frontera di Spanja pa bay Francia, pero ya autoridadnan na francia a wordo informa pa autoridadnan spanjo.

Segun polis 7 di e sospechoso nan a fayece y 4 ta deteni, mientras tanto Gobierno Spaño ta mantene un alerta antiterrorista basta pisa. 

diasabra 19 di augustus, durante investigacionnan haci ta bin sali na cla cu no ta Moussa Oukabir tabata e chauffeur di e van cu a comete e acto terorista pero ta  Younes Abouyaaqoub di 22 aña, kende ta fugitivo.

Diasabra mainta tabata  tin un total di 14 morto y 130 herido.

Diadomingo mainta , polis a duna di conoce cu e acto terorista na Cambrils, di Diahuebs anochi pa Diabierna marduga e 5 miembronan di e terorista cu a fayece, tabata tin planea pa pasa hinka tur hende cu nan topa den nan caminda,

E miembronan di e grupo terorista di Ripoll, segun un corant local 8 ta morto, 4 ta deteni y 3 ainda ta fugitivo. esnan cu a keda aresta mester presenta dilanti corte diamars venidero.

E miembronan di e grupo terorista a escohe intencionalmente un e orario laat di anochi paso nan tabata sigur cu lo tin hopi turista den e area di e waf, segun investigacionnan haci pa polis di catalunia.

Un criatura di apenas 7 aña di nacionalidad Britanico / australiano Julian Cadman no a sobrevivi e acto terorista di diahuebs ultimo na Barcelona.