Home Uncategorized Introduccion di e Landsbesluit/Decreto Nacional pa proteccion di Flora y Fauna local...

Introduccion di e Landsbesluit/Decreto Nacional pa proteccion di Flora y Fauna local Proteccion pa nos mata y bestianan

SHARE

 

ORANJESTAD – Diamars, 15 di augustus 2017 a drenta na vigor e ley cu ta brinda proteccion na diferente mata y bestia local. Ta trata aki di mata y bestia cu ta na peliger di extincion na Aruba tambe mata y bestia cu ta di balor ecologico pa Aruba.

E ley cu a drenta na vigor ta forma parti di e Natuurbeschermingsverordening di 1995. E tempo ey caba a cuminsa cu acumulacion di e especienan local cu ta na peliger di extincion of cu tin balor ecologico. Esaki finalmente a termina den e formulacion di e Decreto Nacional aki. Desde diamars 15 di Augustus 2017, ta prohibi pa mata y causa daño na un cantidad di mata y bestia cu ta aparece den e Decreto Nacional di proteccion flora y fauna local. E Decreto Nacional aki ta menciona detayadamente e nomber scientifico y e nomber local. Prohibicion tambe ta encera exportacion, mata y herida bestia of kap mata y mat’e mata cu ta riba e lista den e Decreto Nacional pa proteccion di flora y fauna local.

A yega na e lista aki den cooperacion cu diferente departamento di gobierno: DWJZ, DNM, DLVV y Veterinaire Dienst.

DNM hunto cu departamento di BUVO y AHATA lo sigui traha hunto pa informa y educa e comunidad.

For di e lista DNM conhuntamente cu AHATA a dicidi di elabora y enfoca a riba 7 sorto cu ta e: Shoco, Prikichi, Cascabel, Coneu, Gutu, Fofoti y Stoki. Por ehempel, for di e 5 bestianan menciona 4 ta den peliger di extinction y e otro ta di balor ecologico. Di e matanan menciona e Stoki, tambe yama Mosterd, ta den peliger di extincion y e Fofoti ta un sorto di mangel cu ta di balor ecologico.

Kico nos kiermen cu balor ecologico? E sorto aki ta necesario pa percura cu e ecosistema keda den bon condicion, pues pa otro bestia y mata keda existi.

DNM kier a gradici tur departamento envolvi y ministerio di Turismo, Transorte, Energia y Medio Ambiente. Gradiciendo tur colaboradornan di potret di e flora y fauna. Cortesia di potret duna door di StimAruba (Flor di Stoki: Sra Olinda Rasmijn), Jads Dive Company (Gutu), Parke National Arikok, Sr. Michiel Oversteegen ( Coneu) y ATA.