Home Uncategorized Dos dia di control riba diferente localidadnan den area di Noord y...

Dos dia di control riba diferente localidadnan den area di Noord y becindario, algun localidad a wordo cera pa 24 ora of a hala nan atencion di gerencia

SHARE
Noord: Diaranson 16 di augustus y Diahuebs17 di augustus, departamento di permiso a tene un accion di control hunto cu personal di Brandweer, D.O.W., D.B.Z. y D.V.G. E accion di control di e localidad nan a wordo reparti den dos grupo. 
Grupo 2 a controla riba 16 di augustus 8 localidad, den cual Ben Tang Bali na Nort y Shiribana Restaurant, Shiribana a wordo cera pa 24 ora pa motibo cu tabata algun detaye cu no tabata na ordo.
 
E otro Grupo tambe a controla 8 localidad den cual e restaurant na Do It Center a keda cera pa 24 ora.
 
E localidadnan cu a wordo cera pa 24 ora, tabata tin varios punto cu nan mester drecha prome, pa nan por pasa e control aki y haya permiso di e departamentonan concerni pa bolbe habri nan porta. 
 
E controlnan a sigui diahuebs 17 augustus,  atrobe e control a wordo reparti den dos grupo.
Un di e gruponan a controla Green Hut Snack, Panaderia del Campo, Mireila Snack’s, Noord Pastry, J.J. Snack Take away, Coco Oasis, Pastissima. durante e control di e grupo aki, J.J. Snacks a wordo cera pa dos bes 24 ora, pa asina por pone diferente punto na ordo. Tambe e grupo aki a bolbe pasa Shiribana Restaurant, pa haci un di dos control pero ainda no por a cumpli cu e exigencianan y e biaha aki a dune, 2 bes 24 ora cera, pa nan por trata na drecha tur loke mester drecha, pa asina por cumpli cu e exigencianan pa cu e siguiente control.
 
E otro grupo a cuminsa cu su control na Babyluz Roadccafe, a sigui  cu Huki di Trupial Snack na MFA Noord, despues nan a bay direccion di Palm Beach, Subway Palm Beach, Pika’s Corner, Gran Victoria Restaurant, Wendy’s, KFC, Domino’s  Pizza.
Gerencia di Domino’s Pizza a wordo poni na altura cu for di nan localidad tin awa ta core bay riba caminda publico y cu esaki mester wordo regla mas liher cu ta posibel.
 
Durante e controlnan, nan a bin ta tuma nota cu  varios localidad no tabata cumpli cu tur e exigencianan mane cu mester ta, pero no  tabata puntonan di gran importancia, cu mester a cera e localidadnan aki, pero cu si mester haya e debido atencion, tur e localidadnan a wordo informa y mustra riba loke falta pa drecha.
 
No ta descarta e posibilidad cu e tipo di controlnan aki lo sigui den e dianan nos dilanti y pesey mes cada un localidad mester tin tur papel na ordo y mester cumpli cu exigencia di Higiena y asina evita cu nan lo por wordo cera pa 24 ora of mas.