Home Uncategorized Partido POR den proximo gobernacion Cultura, historia y derecho estatal di nos...

Partido POR den proximo gobernacion Cultura, historia y derecho estatal di nos pais lo forma parti integral di nos curiculo escolar

SHARE

E siman aki mayoria scol ta habri bek, ta bon momento pa reflexiona unrato riba e situacion di enseñansa aki na Aruba y trece informacion di locual cu POR tin den e plan di gobernacion ‘Vision 17-21 Hunto Nos Por’ pa loke ta Enseñansa.

POR den e proximo gobernacion lo percura pa introduci un “Quality Assurance Program” (QAP). Esaki ta encera un proceso continuo unda a base di “Key Performance Indicators” (KPIs) e scolnan mes ta midi y evalua periodicamente si nan ta cumpli cu realisacion di e metanan di calidad, ta identifica y analisa factor cu ta stroba realisacion di metanan, ta tuma accion corectivo y ta raporta periodicamente na Inspeccion di Enseñansa encuanto cumplimento cu e QAP.

Tambe lo implementa un “Quality Inspection Program” (QIP). Elementonan principal di esaki ta: fortifica Inspeccion di Enseñansa pa e departamento por cumpli debidamente cu su tarea di percura pa calidad halto di enseñansa y introduci un sistema pa monitorea cumplimento cu QAP, unda colaboracion entre scol y Inspeccion lo ta estrecho. Lo elabora e sistema di “leerling Volgsysteem” unda enfoke lo ta riba digitalisacion unda esaki no ta e caso ainda, pa asina docente, directiva di scol y mayornan continuamente por tin bista riba e nivel y desaroyo di cada alumno, klas y scol.

Promocion segun prestacion: ta introduci un sistema uniforme y transparente di evaluacion di funcionamento di e docente a base di su competencianan”. Pa e docente por bin na remarca pa un promocion, mester tin un evaluacion positivo di su funcionamento. E docente cu ta funciona excelente, por bin na remarca pa un bonus. Den curiculo basico Hulandes, Rekenen y Ingles lo wordo duna dor di maestronan specialisa den e respectivo materianan.

Cuerpo di docente conoce un escases grandi. Evaluacion y restructuracion di IPA ta necesario, cu e meta pa mehora e calidad di e instituto aki y percura pa renobacion di cuerpo di maestro. Un posibilidad ta pa integra IPA den Universidad di Aruba.

Introduci pa scolnan un base infrastructural minimo, teniendo cuenta cu e cantidad di alumno, pa loke ta material, ekipo y facilidadnan (por ehempel cantidad di klaslokaal, cantidad di banki y stul pa cada klas, smart TV, cantidad di laptop, conexion di internet, cantidad di baño, grandura di area di recreacion y grandura di areanan cu sombra). Den e cuadro aki lo promove modernisacion y digitalisacion den nos enseñansa y incorpora esaki den e curiculo. Lo evalua un plan realista pa introduccion di airco na scolnan. Evalua y gradualmente expande enseñansa despues di ora di scol (te cu 5or di atardi) pa por duna extra les materianan extracurricular manera arte, deporte, tecnologia y musica. Introduci proceduranan y facilidadnan pa mehora e guia y enseñansa na alumnonan cu problema di comportacion (por ehempel mediante “rebound school” y “summer school”). Restructura EPI y EPB den consulta cu sector priva cu e meta pa mehora e conexion entre enseñansa profesional y mercado laboral. Esaki lo contribui na reduccion di desempleo bou di nos hubentud, mihor salario y trabou den e sector cu a studia p’e. Crea un instituto di formacion adicional entre sector priva y sector publico unda lo crea programanan pa prepara e hoben pa drenta forsa laboral, cu concentracion pero no limita na hobennan cu a termina educacion profesional avansa. Atencion pa idioma den enseñansa: Duna continuacion na implementacion di Proyecto Piloto di scolnan multilingual, como tambe duna prioridad na upgrading di e nivel di Hulandes di tur docente y revision di e curiculo di Hulandes.

Finalmente pero no menos importante ta oportunidad y calidad di enseñansa igual na tur scol, algo cu desde inicio POR a para pe y educacion completamente liber pa tur studiante di scol preparatorio, scol basico y scol secundario.

Lesa mas di locual cu POR ta ofrece comunidad den e proximo gobernacion e plan di gobernacion ‘Vision 17 – 21 Hunto Nos Por’. E ta publica actualmente riba pagina di Facebook di POR E Forsa Nobo.