E siman aki partido MEP a keda completamente babuca ora di lesa un comunicado di prensa di e lider di POR, esta Otmar Oduber kende a declara lo siguiente: “Shift di impuesto directo pa indirecto ta un ‘must’ si Aruba kier prospera economicamente”. Ta increibel e declaracion sorpresivo aki mirando e hecho cu tabata hustamente e lider di POR aki mes durante 7 aña a fungi como minister pa e partido berde y prome cu esey tabata varios aña parlamentario pa AVP y cu durante 2006 pa 2009 a fulmina hunto cu su lider Mike Eman agresivamente contra e impuesto di BBO tempo cu esaki a ser introduci pa e gobierno di MEP na 2007.
Reforma fiscal
Sin duda cu e tipo di impuesto indirecto aki (BBO) ta forma parti di e reforma fiscal cu desde cuminsamento di añanan 90 a ser conseha pa IMF y otro instancianan internacional pa cu su introduccion. Y tabata hustamente e gobierno di MEP, esta Gabinete Oduber cu tabata tin e curashi pa introduci e BBO entrante 1 di januari 2007, pero acopla na esaki a percura tambe pa reduci e tarifanan di impuestonan directo, esta e inkomstenbelasting y winstbelasting. Pues e famoso shift di directo pa indirecto cu awe – despues di 10 aña! – e tal Otmar ta papia di dje!
Elimina BBO
Echo ta cu e introduccion di BBO di 3% no a bay asina facil ya cu nos tur por corda ainda con e politiconan di AVP, incluyendo Otmar Oduber a demonisa e BBO aki severamente, a subi caya, haci bochincha, basha baricada abao y despues durante campaña pa eleccion 2009 a agita pueblo contra MEP demonisando e BBO completamente. E slogan “Elimina BBO, Elimina BBO” a pone cu AVP a gana e eleccion 2009 den forma absoluto. Sinembargo e supuesto eliminacion di BBO a resulta den un mentira flagrante ya cu despues di 8 aña ainda e pueblo ta pagando un BBO/BAZV di 3.5%. Ainda pueblo por corda tambe con Otmar Oduber den un entrevista cu Poentje Castro (dfm) a declara cu e BBO ta un impuesto cu a horca nos pueblo y cu su gobierno di AVP lo bay elimina esaki asina cu nan drenta gobierno.
916 miyon florin na BBO
Sinembargo durante henter e periodo cu Otmar tabata minister, esta for di 2009 te cu 2016, su persona tambe a probecha di tur e sumanan cu BBO a genera como entrada pa gobierno. Y riba dje ningun momento por a scucha durante su 7 aña como minister cu el a para pa principio y sikiera haci e minimo intento pa elimina e BBO aki. Riba e tabel adhunto por mira cu den total e gobierno cu Otmar Oduber a sostene a ricibi un suma di 916 miyon florin den 7 aña y di cual te ainda e pueblo no sa na unda tur e suma aki a bay.
Aunke cu mas di 10 aña mester a transcuri pa por a mira un cambio drastico den e pensamento di e lider di POR y tambe hunto cu ne dos otro candidato cu tambe a sali for di AVP, lo ta na su lugar pa prome cu 22 di September 2017 e pueblo votador haya un splicacion detaya di e motibo cu awe si e reforma fiscal y e shift di impuesto directo pa impuesto indirecto ta gosa e apoyo y sosten di partido POR. Finalmente ta MEP mes tabata e catalisador cu a cuminsa cu e shift aki for di 10 aña pasa y awe tur otro partido tambe ta mira necesidad di e reforma fiscal aki.