Infrastructura riba nos isla ta den un proceso di mehoracion. Cambionan notabel a tuma lugar durante e ultimo añanan, cu e meta pa haci nos isla su infrastructura mas accesibel, conectando districtonan cu otro. Edificionanan nobo tambe a bira mas accesibel pa ciudadanonan cu limitacion fisico. Cu e fase di transicion aki, di mediocre pa miho, e desaroyo continuo riba nos isla a bira hopi visibel.
Diariamente nos por observa cambionan cu ta tumando lugar tur rond di nos isla.
Cambionan cu ta inclui no solamente e ambiente fisico, cu nos ta biba aden, sino tambe e calidad di bida cu nos tin y ta aspira.
Nos ta aspira di realisa pa henter comunidad, un nivel di bida husto y humano. Caminda tin educacion pa tur segun su capacidad; salubridad di calidad pa tur, incluso pa esnan cu tin un deficiencia di salud di un of otro indole.Asina nos kier logra pa nos Pais y su habitantenan progresa.
Nos Pais y nos hendenan ta progresa man den man pa yega na mayor felicidad pa tur.
Un desaroyo asina ta forma e base pa e forsa humano mobilisa y carga nos desaroyo social-economico, cu tin cu ya haci nos economia nacional mas solido y diversifica. Di e forma aki nos kier fomenta mayor participacion y contribucion di henter nos ciudadania pa bienestar di tur.
Nos tin cu tene cuenta y keda den contacto cu otro; y conoce necesidadnan di tur sector di nos comunidad, pa di e forma aki sostene otro. Hoben, adulto, anciano, cu of sin deficiencia, tur tin necesidadnan mas of menos specifico, cu nos tin cu atende. E comunidad cu nos ta aspira ta funciona inclusive; es decir: ta tene cuenta cu tur y ta sirbi interes di tur. Tanto esnan den e proceso di educacion, den e proceso laboral, como esnan cu a baha cu pensioen caba.
Nos tur tin cu hiba conciencia di loke ta nos debernan comunitario y loke nos kier realisa pa y den nos comunidad. Teniendo semper interes general y interesnan specifico di minorianan debidamente na cuenta.
Ami Gerlien, ta determina pa duna uncontribucion eficaz y constante na formacion di e comunidad aki cu lo eleva nos nivel di bida y nos conciencia social na beneficio di mayor felicidad pa henter pueblo di Aruba.