Home Uncategorized Mas cu 200 Studiante a sali rumbo pa Hulanda

Mas cu 200 Studiante a sali rumbo pa Hulanda

SHARE

ORANJESTAD, Aruba- 3 di Augustus 2017: Dialuna dos grupo di beursalen a sali pa Hulanda pa sigui cu nan estudio. Minister di Enseñansa y Famia, Michelle Hooyboer-Winklaar tabata presente pa asina desea e studiantenan exito. Tur aña ta un tradicion cu ta dispidi di un grupo di studiante, kendenan a biaha prome pa Corsou y despues sigui pa Hulanda. Durante e encuentro cu e studiantenan, Minister Hooyboer-Winklaar a haya e oportunidad di combersa cu e studiantenan y kico a inspira nan pa sigui nan estudio den exterior.

“Manera tur aña mi ta ripara cu e studiantenan na basta trankilo pero alabes entusiasma pa nan biahe. Mas cu tur cos mi ta constata cu nan ta bon prepara”, e mandatario a expresa. Awendia e studiantenan ta haci investigacion riba tur aspecto y hopi di nan nunca a bay Hulanda, pero asina mes tin e habilidad di busca hopi informacion, nan ta sinti nan mes hopi comodo y nan ta sinti nan mes hopi bon prepara pa por yega eynan. Asina aki di biaha nan por forma parti di e comunidad di Hulanda y pasa den un periodo pa adapta nan mes.

Minister di Enseñansa ta haya cu esey ta hopi bon y den nan concepto esey ta yuda cu e exito tambe na scol. Si nan ta bay relativamente na un manera bon prepara y pa asina yega eynan y cuminsa enfoca di biaha riba nan estudio. Esaki ta e aspectonan hopi importante pa sigura cu studiantenan ta keda riba e rumbo cu e mester pa termina den 3 pa 4 aña.

Siman pasa tabatin un problema, unda cu 20 studiante no a logra haya stoel riba e mesun vuelo. Segun Directie Onderwijs, esaki ta algo cu ta sosode tur aña y nunca tur studiante ta bay hunto. E aña aki e grupo di studiante biahando pa Hulanda tabata mas grandi cu aña pasa cual a haci cu no por a ubica tur riba e mesun vuelo. Hopi biaha ta purba di haci e reservacionnan di antemano, pero hopi biaha e cantidad no ta klop cu e cantidad completo.

Dialuna e prome grupo a sali, pero lamentablemente e grupo cu mester a sali diamars no a logra debi na un fayo den e avion di Insel Air na Corsou, pa cual a cancela e vuelo entre Aruba y Corsou cu consecuencia cu e studiantenan no a logra yega pa subi KLM pa sigui pa Hulanda. Ta haciendo tur lo posibel awor pa pone nan riba un otro vuelo sea di KLM mes of otro aerolinea.

Pa loke ta otro necesidadnan pa e studiantenan na Hulanda, Minister Michelle Hooyboer-Winklaar a splica cu compara cu añanan anterior, e biaha aki un grupo basta grandi ta bay studia na Canada y Merca tambe. E proceso pa cu esaki no ta mescos, pasobra no ta un solo vuelo ta bay pe ciudadnan ey. Asina mes lo haci un esfuerso pa tuma contacto cu nan pa por duna nan informacion y tambe dispidi di nan.

Pa Minister di Enseñansa ta hopi importante pa trece e diversificacion ey, esta mas opcion pa studiantenan. Hopi biaha ta bisa cu Hulanda no ta pa tur hende, Merca tampoco ta pa tur hende, Canada tampoco. Pero e ora tin un opcion cu e studiantenan por scoge e studio cu pa nan ta fit mas miho y e pais tambe, unda cu nan por mira cu ta haci nan estudio mas exitoso posibel. Pa Ministerio di Enseñansa esey ta importante y ta contento cu awo por a mira cu tin diferente opcion pe studiantenan.

Minister Michelle Hooyboer-Winklaar a desea tur studiante exito cu nan estudio den e periodo di transicion pa nan por keda enfoca hopi estrecho riba nan metanan pa na final di dia nan logra nan diploma y regresa bek. Ta deseo di mas grandi pa cu e studiantenan por regresa y cla pa asumi cu nan otro fase di bida y cuminsa cu nan carera profesional.